Ed Sheeran-a'n online-in music zirtir

Ed Sheeran chuan Lon­don primary school nau­pang­te online-in music a zirtir.

Kum 29 mi Sheeran hi school zirtirtu pakhat, a ṭhian hnai tak, Ecclesbourne Primary School-a music director nen an in-video call a, hetah hian naupangte chu music hi a zirtir a ni.

Naupangte hnenah chuan Sheeran chuan maths, science leh english subject-te a thiam loh avangin mi a takah rei tak chhung a inngai tih sawiin, music chu a kalna kawng tur a ni tih a hriat hnu chuan a nun chu a ṭha zawngin a inthlak danglam ta tih a sawi.

"Music play hi nuam ka ti a, chu chu min tihlimtu ber pawh a ni," tiin Zoom kaltlanga video call-ah chuan a sawi a, a pain musician a nih duh chuan rim taka a thawh a ngai tih a hrilh ṭhin thu a sawi bawk.

"Music chu hna bera neih ka duh a, mahse a harsain paltlang tur a tam hle," a ti.

Harsatna leh retheihna tam tak paltlang tawhtu Ed Sheeran hi tunah chuan khawvela zaithiam lar ber pawl a ni tawh a, album pawh maktaduai chuang hralh tawhin khawvel hmun hrang hranga music chart-ah No.1 a ni thei.

Sheeran hian naupangte hnenah hian a hla hit ṭhenkhat play dan a ziritir a, chung zingah chuan 'Perfect' pawh a tel.

Music thar engtikah nge a tihchhuah dawn tih an zawhna chu chhangin kumin chhung chuan hla thar tihchhuah a tum rih lo a, nakkum lamah erawh a tichhuak mai thei a ni.