2021 Oscars ceremony tikhawtlai mai thei
2021 Academy Awards chu coronavirus darh zel vangin thla li laia tih khawtlai a ni mai thei.
Kum tina sem ṭhin, film lama chawimawina ngaihhlut Oscar hi a tlangpuiin kum tir lamah sem a ni ṭhin, mahse hripui a leng miau a, nakkum lamah chuan May emaw June emawah an sem daih mai thei a ni.
Kumin chhunga film tihchhuah tur tam tak hrileng vanga tihkhawtlai a nih avangin Academy of Motion Picture Arts and Sciences chuan Oscar nomination a tam zawk theihna turin kum dang aiin thla li vela sawn hlat mai hi an tum niin thuthang a awm a, hei hi a dik a nih chuan kum 93 chhunga a vawi khatna turin Oscar calendar an thlak dawn a ni.
The Sun chanchinbua Bizarre column-ah chuan Oscar buatsaihtute chuan kar khat chuang Academy Awards ceremony neih hun tur chungchang hi an ngaihtuah tawh tih tarlan a ni a, February 28-a sem tura ruahmanna awm tawh sa chu May thla tawp lam emaw June thla tir lamah emaw sawn mai rawt a ni tih an tarlang bawk.
Rawtna awm hi a tlang a nih chuan film tlangzarhtute chuan kumin kum tawp lam emaw nakkum kum tir lamah emaw Oscar an dawn theihna turin film an tlangzarh thei dawn tihna a ni a, mahse thuchiang erawh engmah a la awm lo thung a ni.