Highland Blues Festival – 3rd December, 2022 ah neih a ni dawn

Mizorama a vawikhatna atan Blues Music ngainatu kal khawm- Mizoram Blues Foundation-te chuan December 3, tlai dar 4:30pm aṭangin ‘Highland Blues Festival’ hun hlimawm an buatsaih dawn. He Blues Festival-ah hian Mizorama musician ṭha rual – K. Hminga, Evenflow, Matilda & The Quest, Cassettes, 3 Peace (Bruce, Jonah Ralte & Rs-a) leh John & Maenga te an rawn che dawn. Blues Music ngaina mi tan chuan hmaih phal chi a nilo!

Eng nge Mizoram Blues Foundation chu?
Mizoramah hian Blues Music ngaina leh tuipui an tam em em laiin, mahnia tuipui leh, in hre pawh lem lote an ni thung. Mizorama kan musician, Blues music lama tui in sawm khawmin, he music tuipuitu apiang te huapzo taka an inpawh tlan theihna tur leh, Blues Music chawikan nan Mizoram Blues Foundation hi din a ni ta a ni. An pawl hian hmachhawp lian tak tak a nei a, a hmasa ber atan Highland Blues Festival hi buatsaihin, a tui apiang tel turin an sawm a ni. A hnu zelah pawh Mizoram pawn mai bakah India ram pawn a musician leh artist ṭha te sawm luh an tum thu an sawi.

Highland Blues Festival
Highland Blues Festival hi mitin huap, tlai ni tla thlir chunga blues music nena mipui awi thei tura buatsaih a ni dawn a, tlai dar 4:30 ah ṭan a ni ang. The Aijal Club Park (tunhma a City Park tih ṭhin)-ah buatsaih a ni dawn a, ticket hi chi hnih, Rs 1500 leh 500 man siam a ni. Rs 1500 man ticket hian Free Dinner tui tak a keng tel dawn thung. He event-ah hian a chhungah ei leh in chi hrang hrang a awm dawn a ni.

He event pumpui hi Monks Event Management te buatsaih tur a ni a, CK Hyundai chu main sponsor niin, Niflux LED Lights leh Airtel Xstream Fiber ten an co-sponsor bawk. Ticketing partner Darbu Music App niin he App kaltlang hian ticket a lei theih. Hei bakah hian Hotel Platinum – Zarkawt, Computer House- Millenium Centre, Lushai Hills Residency – Zarkawt leh SD Enterprise – Millenium Centre ah te lei theih a ni bawk.