Fleetwood Mac member, Christine McVie a thi

British-American rock band, Fleetwood Mac musician leh hla phuah thiam, Christine McVie chu Nilaini khan kum 79 mi niin a thi.

An band member a thih thu an hriat hnuah, McVie bandmate-te chuan, "Mi danglam bik, special leh talent nei ṭha chungchuang a ni. Eng band pawhin ani anga musician ṭha neih hi an chak vek a, chu zawng ai chuan kan ṭhian ṭha tak kan chan a ni. Kan nun peng pakhata a lo tel thei erawh vannei kan inti hle." tiin Twitter-ah an thlahna thu an sawi.

McVie hi mimal anga a zaina leh, kum 1970 aṭanga a zawm Fleetwood Mac member angin rimawi khawvelah hlawhtling takin hun a hmang chho a ni. Fleetwood lama a awmchhung hian an band chuan Hot 100 hits hla 25 an nei hman a, top 10-ah hla pakua leh, kum 1977-a an tihchhuah "Dreams" chu pakhatna hial a thleng thei a ni.

An band hian Billboard 200-ah album 29 an lanpui thei a, chung zingah chuan top 10 pasarih leh No 1 pali, heng Rumours, Fleetwood Mac, Mirage leh The Dance-te an nei tel.

Solo artist anga a zainaah McVie hian hla hit, “Love Will Show Us How” leh “Got a Hold on Me,”te chu Hot 100 top 10-ah a lanpui thei a ni.