BTS Docuseries ‘Monuments: Beyond the Star’ Kum 2023-ah tichhuak dawn

BTS-in chawlh lailawk an puan lai leh mimala an kal hran mek laiin, ARMY tan thu hriat lawmawm lam a awm leh dawn ta. Disney+ chuan kumthar lamah hian K-pop icon documentary series, mipui la hmuh ngai zen zen loh ṭhahnem tak an tlangzarh dawn tih an tarlang.

'BTS Monuments: Beyond the Star' hi “music docu-series” lam hawi niin, kum zabi 21-naa pop icon-te zinkawng lam hawi a ni dawn tih NME chuan a sawi. He series-ah hian an band-in kum kua chhunga an nitin hun hman dan tlangpui te, an ruahmanna, an hmabak zelte bakah music leh video footage ṭhahnem tak zeh tel a ni ang.

Disney+ hian series tihchhuah hun tur hi an la puang lo a, "Kan chanchina in la hmuh ngai loh tam tak in hmuh kan beisei," tiin clip tawp dawna Jungkook-a'n a sawi lai chauh dah a la ni.

BTS chuan July thla khan band anga an hmalakna chu chawlhsan lailawk an tum tih an sawi a, hemi rual hian engtik hunah emaw chuan insuihkhawm leh an tum thu an tarlang tel nghal bawk. Member-te hian solo project buaipui hna an thawk mek hlawm a, mandatory military service nei turin an inpuahchah mek bawk .

Mimala kal an ṭhatpui rih
Jungkook chuan Qatar-a World Cup opening ceremony chu hlawhtling takin a lo khuhhawng tawh a, hei hian huhang a ngah tawk zia a rawn tilang.

RM chuan a solo album hmasa ber 'Indigo' chu nimin khan a tichhuak ve leh a, hetah hian South Korean rapper chuan a chanchin leh hringnuna a paltlangte chu diary angin a rawn tarlang.

K-pop boy band zingah RM hi solo LP tichhuak hnaivai ber niin, thla liam ta khan J-Hope chuan track 10 awmna "Jack in the Box" chu a lo tichhuak tawh bawk.

BTS member zinga upa ber leh South Korean military zawm hmasa ber tur, Jin chuan kar liam ta lamah khan a solo single "The Astronaut" chu a lo tlangzarh tawh bawk a ni.