MDM-in Lunglei-ah 'Circle of Music Meet' an hmang ; TNT Lunglei Home-ah ṭanpuina an pe

Music Domain Mizoram (MDM) chuan kum tina an hman ṭhin 'Circle of Music Meet' chu November 28, Thawhlehni zan khan Lunglei-ah an hmang a, TNT Lunglei Home, Theiriatah ṭanpuina thilpek an pe bawk. He programme hi MDM leh RAIN, Lunglei ṭangkawpten an buatsaih a ni.

Circle of Music Meet 2017-ah hian MDM President, Tea Boitlung chuan inlawmna thu a sawi a, Lalnunkenga Chuaungo (Manuna), General Secretary-in report a pe a ni. Tun hnaia an executive member boral ta C. Vanlalsanga (C.Sanga) sunna hun hman a ni. C.Sanga hi MDM president lo ni tawh a ni a, a sunna hun hi urhsun taka hman a ni. He hun hmang tur hian Aizawl aṭangin zaithiam lar mi 17 zet an kal a, MDM hruaitute nen an thawk chhuak a ni. Lungleia MDM Artist-te nen 'Open Air Charity Concert' hlimawm tak an buatsaih bawk.

Meet-ah hian MDM Award sem niin, MDM Singer of the year gospel leh lengzem thlan a ni. Award hi One In Christ leh Intonation-te hnenah hlan a ni. MDM Lifetime Achievement Award chu Pu T. Lalengzauva hnenah hlan a ni bawk.

He hun hi Pu Joseph Lal­himpuia, MLA leh MDM Senior Adviser ni bawk chuan a hman pui a, Home ṭanpuina tur hian sum ṭhahnem tak a pe a ni.

MDM hian TNT Lunglei Home tan hian sumfai Rs. 20,000/- an hlan a, Hand Glove box 2 an pe bawk. Hei bakah hian MDM member-te'n an thawhkhawm thawmhnaw ṭhahnem tak an hlan bawk.

MDM chuan Circle of Music Meet an hman theih nana hmun leh hma phal taka hman tirtu TNT Lunglei Home director leh hotu dangte chungah lawmthu an sawi.