Coffee Nite pualin music video tichhuak
Salvation Army Youth, Aizawl Temple Corps-te'n kum tina an buatsaih ṭhin, Coffee Nite chu kuminah pawh hman leh tura ruahman a ni a, hemi pual hian music video tlangzarh a ni leh der tawh.
Artist hrang hrangten an sak ‘Immanuela’ tih hla hi Lalfakzuala phuah a ni. Coffee Nite 2017-a inlan tur artist ṭhenkhatten he hla hi an sa a, chung zingah chuan
Duhsaki, Eunice, Dj-i, Hlimhlimi, Kimkima, Sawmtea leh Henry Varte te an tel. Musician-te hi Ephraim, Muanpuia, Kimkima leh David-a te an ni nawk a, Horn section hi Bena, Zawma leh Chhuanga ten an pui a, Live Recording tih a ni. A hla hi Kings & Prophets Recording Studio-a record niin, video hi Milestone Picture kutchhuak a ni thung.
Coffee Nite Organizing Committee chuan kuminah pawh a ṭum 18-na atan Coffee Nite hi hlawhtling taka buatsaih leh ngei an tum thu an sawi a, inbuatsaihna ngawrh takin an kalpui mek tih an sawi. Coffee Nite kaltlanga mite ṭanpuina lo pe tawhtute chunga lawmthu an sawi a, kuminah pawh mi harsate tana luang chhuak leh turin mipuite an ngen. TV, FM, Radio leh DDK lam thlenga lo thlir ṭhin tute chungah lawmthu an sawi a, tuna music video an siam pawh hi lo thlir sak leh turin an ngen bawk.