Rooney goal 3-na a Ropui

Wayne Rooney-a'n Everton kawr ha chungin a vawi khat nan hattrick a siam, Nilaini zan Premier League inkhelah Toffees chuan Goodison Park-ah an mikhual West Ham 4-0 in an sawp. Kum 32 mi Rooney hian hattrick siam turin anmahni lam aṭangin England international keeper Joe Hart dan hman loin mawi takin a pet kum lut.

Everton manager ni mai tur Sam Allardyce chuan a hmunah inkhel a en a, manager lai lawk David Unsworth-a'n inchhuang takin Big Sam tan hmun a kian thei ang. West Ham manager David Moyes-a'n a club hlui a hmachhawn hmain zahngaihna a awm loh tur thu a sawi lawk mah se Scottish manager hian a hlawhtlin tawhna hmunah sulhnu hlui chhui tur a nei lo a, zahna kawn bak paltlang a nei lo.

Hattrick chu

Everton forward Dominic Calvert-Lewin chuan minute 18-naah penalty a hlawh chhuak a, Rooney rawn pet chhhuakin Hammers keeper Joe Hart-a'n dang mah se a per chu tauh goal nghal. Minute 10 hnuah Tom Davies leh Jonjoe Kenny te thawhrah sengin Rooney hian a goal hnihna a khung leh bawk a, Everton din­hmun ṭha takah a dah bawk.

Minute 66-naah goal thum zinga mawi ber chu Rooney-a'n a khung. West Ham keeper Joe Hart ball clear sual chu halfway line hnung lama awm Rooney zawnah kalin English forward hian goal-ah pet nghal pawpin keeper Hart leh Hammers defender tan dan hman a ni lo. Everton defender Ashley Williams-a'n minute 78-naah goal lina a tauh lut leh bawk.

Rooney chuan, "Ka goal khung tawha chhuanawm ber zinga mi a ni. Ka football career-a ka pet fuh ber pawl a ni a, Everton tana ka hattrick hmasa ber a ni lehzel nen, ka tan chuan hun duhawm bik a ni," tiin a goal khung hlut bikna chhan a sawi.

Danglam tura duan

Khawvelah hian danglam tura piang an awm a, football-ah chuan Rooney hi mi bik tura duan zinga mi a ni. Everton ṭanin Rooney-a'n bul a ṭan a, match 30 chak tluang tawh Arsenal record tihtawp nan kum 17 piancham tlin hma ni nga la awmin goal mawi a khung a, hetih hunlaia Premier League-a goal khung thei naupang ber a ni.

Rooney-a'n a club hmangaih kalsanin Manchester United a zawm a, player ṭha bik a nih avangin fan-te ngainat a hlawh nghal a. English forward hian United (253 goals) leh an ram England (53 goals) tana goal khung tam ber record a siam hnuin a bul ṭanna Toffees-ah bawk a kir a, kum 32 mi ni tawh chungin goal khung tura rin hlawh ber a la ni.

Amaherawhchu, English striker hian a club hlui a zawm leh hnuah hun duhawm vek a tawng bik lo a, captain armband a hren hmasak ber ṭumin Europa League-ah Atalanta lakah 5-1 in an tlawm. Hemi zawh league match-ah Rooney hi awltir a ni a, Southampton lakah 4-1 in an tlawm leh bawk. Goodison Park-ah Rooney-a'n bul ṭanin captain armband a hreng leh a, goal ropui khungin hattrick a siam a, United tana nomawi chi tin chawi tawh player hian league nomawi beisei pha tawh lo mah se Everton ṭantute hlimna erawh a la siam zel.

Eng nge an sawi?

Everton manager lailawk boss David Unsworth chuan, "Ka tan chauh ni loin club tan zan duhawm tak a ni. Ka player-te an theihna zawng zawng chhuah turin ka ngen a, an puitling tawh tih an lantir a ni. Hun harsaa kan chet dan hian thil tam tak a sawi a ni," tiin an khelh danah a lungawi thu a sawi.

Unsworth chuan sawi chhun­zawmin, "Sam Allardyce nen minute 10-15 bawr vel club chan­chin a thu phungin kan sawi dun a, West Ham hneh team erawh ka rem a ni," tiin player thlan chungchangah Big Sam a la inrawlh loh thu a sawi. Everton player hlui Unsworth hian Under 23 team a enkawl chhunzawm ang.

Hammers manager David Moyes chuan, "First half-ah chuan kan khel ṭha lo a, amaherawhchu second half-ah nasa takin hma kan sawn a ni. Hetiang scoreline hi kan phu lo a, kan tihsual kan tuar a ni," tiin a sawi. West Ham midfielder Manuel Lanzini chuan 2-0 a nih laiin penalty a hlah a, Moyes chuan hei hi inkhel daglamna chhan a nih thu a sawi tel bawk.

Everton hi table-ah 13-naah invawrh chhoin West Ham erawh 18-naah awmin tla thei dinhmunah an awm.