Bieber-an tui thianghlim in tur daih rei zawka a awm theihnan hma a la ; Hman khat daih plastic tihtlem tumin hma kan la - Bieber

Justin Bieber chuan khawvelah tui thianghlim in tur tam zawk siamchhuah a nih theihna turin chak takin hmalakna a kalpui mek.

Bieber leh Generosity Beverages CEO, Micah Cravalho-te thawkdun chuan bottled water brand 'Generosity' an din a, he an hmalakna kaltlang hian alkaline tui chu khawvel pumah fountain-ah thun khah mai theih turin chhawpchhuah an tum. An hmalakna hmasaah, FIFA World Cup neih mekna Qatar-ah water fountain 150 chu mipui hman theihin an chhawpchhuak bawk. "Khawvelin awlsam zawka tui thianghlim in tur an neih hi ka duh a ni. Khawvel ram te pawhin an mipuite a ṭha thei ang ber pe se ka ti hle. Plastic chuangliam hian chhiatna min thlen a, renchem zawka kan kalpui a ngai a ni," tiin Bieber chuan rimawi piahlama a hmalak dante a sawi.

Bieber chuan an tui thianghlim siamchhuahchungchang sawiin, 'Generosity' hi tui thianghlim in tur mai bakah, hman khat daih plastic tihtlemna tura hma la kan ni. Water technology-a hmahruaitu nih tumin kan bei mek a, plastic bottle vawi khat kan hmana kan tihral mai lohnan min dawrtuten awlsam taka an 'refill' mai theih dan kawng kan sial a ni," a ti.

Bieber leh Cravalho-te hian tunhnai khan Qatar hi tlawhin, an ram Lal farnu Sheikha Al Mayassa bint Hamad bin Khalifa Al Thani chu an hmalaknate an sawipui bawk. Grammy Award winner hian khawtlang ṭhatna turin hmalakna hrang hrang a lo kalpui tawh ṭhin a, chung zingah Pencils of Promise organization-te nen thawkdunin, ram hnufualah school leh zirna kawnga an mamawhte a pe ṭhin. Kum 2020-a Ariana Grande nen an thawhdunna hla, "Stuck With U" hmangin, First Responders Children’s Foundation tan USD maktaduai 3 chuang a lo thawkchhuak tawh bawk a ni.