Billboard Women in Music 2017 Selena Gomez leh Camila Cabello an langsar

Billboard Women in Music 2017 chu buatsaih a ni leh ta a, he hunah hian award hrang hrang sem a ni. Selena Gomez chu 'Woman of the Year' atan thlan a ni a, 'Breakthrough Artist' chu Camila Cabello a ni.

Billboard Women in Music hi hmei­chhe tan bik buatsaih ṭhin a ni a, kuminah pawh khawvela huapa hmeichhe zaithiam larte hnenah award hlan an ni. Camila leh Selena bakah hian, Mary J Blige, Kelly Clarkson, Kehlani, Solange, Grace VanderWaal leh Atlantic Records COO Julie Greenwald-te hnenah award hi hlan a ni.

Award a dawn zawh hnua Selena-i thusawi chu khawthlang media-te tuipui ber a ni a, Justin Bieber nena an inkar pawh a sawi lang. 'Woman of the Year' atan thlan a ni chu thinlung taka a lawm thu sawiin, inchawimawina sang tak a ni, a ti. Bieber nen an inkar a ṭhat thu a sawi a, "Kan inngaihsak tawn tih bak sawi tur ka nei lo. Ka hriselna ka ngai pawimawh a, ka chhungte chungah pawh ka lawm a ni" a ti.

Breakthrough Artist atana thlan Camila Cabello chuan a hla hit 'Havana' hmangin mipuite zaiin a awi a, lawm a hlawh hle. Kelly Clarkson pawh a perform a, mipa lamah Ed Sheeran leh Pharrell Williams bakah midang eng emaw zat an inlan a ni.