PETA-in Harry Styles, Daisy Ridley leh Nicola Peltz Beckham chawimawi

America-a ransa humhalhtu pawl, People for the Ethical Treatment of Animals (PETA) chuan Harry Styles, Daisy Ridley leh Nicola Peltz Beckham-te chu nungcha humhalhna kawnga an chetna leh hmalaknate avangin chawimawi an hlan.

Music lama kum ṭha hmangtu, Harry Styles chuan rimawi piah lam thlengin chawimawina a dawng. Harry hian Madison Square Garden, New York City-a a zai laiin stage-ah chicken nuggets an vawm chhoh chu ei duh loin, mipui hmaah sa lam chi a ei ngai loh avangin PETA chuan fak phu ah an ngai a, 'Don’t Worry Darling' actor hi 2022 Liby Awards an hlan a ni.

English mi lemchanthiam, Daisy Ridley chu University of Massachusetts Amherst hnenah, zawng hmanga experiment an neih ṭhin titawp tura ngenna lehkha a thawn avangin Favorite PETA Collab an hlan.

Nicola Peltz Beckham chuan social media kaltlanga amah leh a pasal Brooklyn Beckham-a'n uite an adopt avangin Pawsome Adoption Advocate a dawng. Nicola chuan a followers mi mtd 2.7 te chu an tlin phawt chuan adopt emaw chawm emaw turin a ngen zui bawk.

"Heng celebrity khawngaihna ngah takte hian an thlenga arsa awm ei loh mai te, rawng taka ransa enchhin titawp tura ṭawngchhuah leh enkawl zui tura an auchhuahnate avangin an tihtheih sang ber an lantir a ni," tiin PETA senior vice president Lisa Lange chuan a sawi a, entertainer leh influencer-te hnathawh chu PETA chuan hlu kan ti hle a ni, a ti.

Kumina award dawng thei tur zingah, Kourtney Kardashian leh Travis Barker, Bella Hadid, Jonas Brothers, Hailey Bieber, Jimmy Fallon, Prince Harry leh Meghan Markle, Drew Barrymore leh Janel Parrish-te hming pawh chhawpchhuah an ni.