Demi Lovato-i'n album thar buaipui mek

"Cool for the Summer" hitmaker Demi Lovato chuan music thar buaipuiin studio lamah a hun tam zawk a hmang mek.

Kum 30 mi hian Pathianni khan a social media platform lamah a studio album pakuana tur hi a bawhzui mek thu sawiin, kumin August thla khan a album pariatna "HOLY FVCK" chu a lo tichhuak tawh bawk. He album chungchang a sawinaah, pop music a mangṭhana leh album-a a hlate chu harhfim taka a ziah vek awmchhun an la nih thu a tarlang.

Rimawi khawvel piah lama buaina neuh neuh nei ṭhin Demi chuan, "Thil tam tak ka paltlang ve ta a, khawvel hriata han thup chi ziazang pawh a ni tawh lo. Kuminah pawh ka buaina ngaiah ka tlulut leh a, treatment ka lak zawha ka hriatchhuah tak chu he thil (a album sawina) keima tana ṭha tur leh ka nihna dik tak phochhuak thei album ṭha ber siam ka rilruk chho ta a ni," tiin June thla khan a lo sawi tawh.

Demi chuan a ṭha thei ang bera hma kan la dawn a nih chuan ruihtheih thil tel lo, rilru harh fim taka kan awm a ngai ani tiin, a studio album pariatna pawh kha ruihtheih thilin a tihbuai loh laia a phuah vek an nih avanga amah pawh a inchhuan thu a sawi.