Zanin Mizoram Premier League Final-ah zaithiam rual

Football khelmual lama inkhel an ṭan hmain zanin hian Mizoram Premier League Final khelhnaah zaithiam rual - Chali (Evenflow), Jaui leh TBC Zaithanpuia-te an inlan dawn a, zan dar 6:30 aṭangin an zai ṭan ang.

MFA lamin mikhual pawimawh an nei dawn a, All India Football Federation president Kalyan Chaubey chu MPL Final inkhel en turin a lo zin dawn.

Inkhel ṭan hma hian entertainment programme hman a ni ang. Mizo hmeichhe zai thiam zinga live performance nei ṭha ber pawl Chali a che dawn a, ani hi chu 'export quality' a ni a, a che vel en tawh chuan an ngaina ṭhin, zaninah a hmuh theih ang.

Jaui chu sawi nawn a ngai lo. A zai thiam a, a lam thiam a, a 'jei' tel bawk a, fans a nei ṭhahnem hle. Tun hnaiah Mizo Idol judge-ah ṭangin zai leh lam chang ni lo pawh a thiam tih a lang tawh a, tunlai Mizo hmeichhe zaithiam lawm hlawh ber pawl a tling.

TBC-a boruak chu kan hre tawh a, sawi nawn ngai loa Mizo zaithiam langsar a ni. Ani hian 'Krismas urlawk' a rawn nei dawn a nih hmel a, Krismas hlate nen Rajiv Gandhi Stadium-ah mipui sang tel an zaiin an lam dawn pawh a ni mai thei!

Inkhel ngaina lo tan pawh anni hi kal chhan tham an tling mai awm e.