A kar lina atan Wakanda Forever bawk a chungnung, ‘Violent Night’ pahnihna

US box office lamah “Black Panther: Wakanda Forever” tuk dawl thei an la awm lo a, kar li chhung a zawnin sum lalut tam ber dinhmun a hauh. Universal kutchhuak, holiday thriller film, “Violent Night,” pawhin a chung en a ngai rih tlat.

Mihangte'n an culture pholangtu tiha an sawi ṭhin, superhero sequel hian theatre 3,855 aṭangin USD mtd 17.6 a lalut a, US bikah USD mtd 393.7 lai hailut tawhin, khawvel pumah USD mtd 700 dawn a lalut tawh. Kum 2018-a tihchhuah 'Black Panther' khum thei turin dinhmun ṭha takah a awm mek a ni.

Sum sen tlemna 'Violent Night' beisei aiin a hlawhtling
Kar liam taa US ram pum huapa film tlangzarh awmchhun, “Violent Night,” chuan hunpui boruakah mipuite phurna a chawk tho zo lo a, Wakandan warriors meuh paihthla tur chuan an ti a la tuai deuh. David Harbour channa, R-rated action comedy film hian North America-a cinema 3,682 aṭangin USD mtd 13.3 a lalut a, USD mtd 10 lalut tura beisei ni mah se, a siamtute chhutlawk chu a khum. Khawvel huapah USD mtd 7.05 lalut bawkin, a sum lakluh belhkhawm hi USD mtd 20.35 a tling tawh a, he film siamna atan hian USD mtd 20 chauh an seng a ni.

Disney animated adventure film, USD mtd 200 chuang zet senna, “Strange World” chuan beisei a phak lo chhunzawm zel a, kar liam ta khan USD mtd 4.9 chauh lalutin pathumna a ni. He film hian North America lamah USD mtd 25.5 lalut tawhin, khawvel huapah USD mtd 42.3 chauh a lalut a, USD mtd 100 bawr vel hloh turin film expert-te chuan an chhutsak a ni.

Box office top 5
1. Black Panther: Wakanda Forever - USD mtd 17.6
2. Violent Night - USD mtd 13.3
3. Strange World - USD mtd 4.9
4. The Menu - USD mtd 3.6
5. Devotion - USD mtd 2.8