Guns & Roses'in Texas-a silai dawr an khing

American hard rock band, Guns N' Roses chuan Texas-a silai dawr, 'Texas Guns and Roses' chu an band nena inkungkaihna nei thei zawnga an dawr hming an phuah avangin an lakah thubuai an thehlut.

Axl Rose leh a bandmate-te chuan Texas-a silai dawr hi GNR thawhpui emaw inzawmna nei emaw tiin mipui an bum theih avangin dawr neitute hi an khing a ni.

GNR hian an dawr hming chu thlak tur leh, band hmingchhiatna zawng zawngah pawisa ṭhahnem tak chawi turin an ti. Dawr neitu David L. Clark erawhin an dawr leh band hriatpawlhna chhan tur a awm loh thu sawiin, "Buaina chu awm bawk mah se, finfiahna erawh an nei lo. Kan sumdawnna tihchhiat tumna leh pawisa an duhluat vanga hma la an ni," tiin a tawp thleng beihlet an tum thu a sawi.