Norwegian Elvis Presley world record siam

Norwegian Elvis Presley tia an sawi ṭhin, Kjell Henning Bjornestad chuan darkar 50, minute 50 leh second 50 chhungin Elvis-a hlate chu chawl loin a sak theih avangin zai rei thei ber world record a siam.

Bjornestad hi online competition-ah a tel a, he hunah hian darkar 50 chuang Elvis-a hlate hi a sa thei a ni. Hemi record lo siam tawhtu chu darkar 7 chuangin Bjornestad chuan a  khum ta a ni. Kar liam ta Inrinni khan kum 52 mi Bjornestad hian online competition-a a zai chu a zo fel thei a, a zaina hmun hi Norway khawpui Oslo-a bar-ah niin Ningani zing aṭang khan a zai ṭan a ni. A manager chuan a zai hun chhung hi ni hnih leh zan hnih a nih thu a sawi. Bjornestad hian a hmain record a lo siam tawh bawk a, kum 2003 khan darkar 26 chuang chawl loin Elvis-a hlate hi a lo sa tawh bawk.

Norwegian television-in Bjornestad chuan hetiang thil hi tihnawn a tum tawh loh thu a sawi. Kjell Henning Bjornestad hi Elvis angin a inthuam ṭhin a, a stage name-ah pawh  ‘Kjell Elvis' tih an phuah nghe nghe. Legendary singer Elvis-a hla zawng zawng a sa chhuak hman deuh veka, a sak zawh hnuah a bul aṭangin a sa ṭha leh a ni.