Emmy nominations 2020-AH Watchmen-in nomination a hmu tam ber

American award television industry-a che ṭhate chawi­mawina Emmy Awards nomination chu Thawhlehni khan an puang chhuak ta a, HBO superhero series 'Watchmen' chuan nomin­ation a hmu tam ber.

'Watchmen' hian nomina­tioan 26 ngawt a hmu a, 'The Marvelous Mrs. Maisel' chu hmu tam ber dawttu niin 20 a hmu a, 'Succession' chuan 18 lai a hmu ve bawk. Primetime Emmy Awards vawi 72-na tur atan nomination list tarchhuahah hian Netflix chu an che ṭha hle a, an film tihchhuah aṭangin nomination 160 lai an hmu a, streaming service thar pahnih  Disney+ leh Apple TV+-te pawhin Emmy nomination-ah hian hmun an chang nghal.

Netflix dawtah hian HBO chu an che ṭha hle a, nomination 107 ngawt an hmu bawk. HBO hian an chet ṭhatpui ṭhin Game of Thrones chu nikum lamah a hmar an bawk ta si a, kum tam tak chhung HBO hi an chet ṭhatpui tawh a, kumin Emmy Awards chu GOT fan-te tan chuan a khaw­harthlak hle ang. GOT chauh hi kumina hmun ruak nei zau an ni lo a, kumdanga an elpui ṭhin Veep leh Fleabag-te pawh an chhuah tawh loh avangin kuminah hian kan hmu tawh dawn lo bawk.

Emmy Award semna hun hi September 20 hian ABC-ah virtual-in buatsaih a ni dawn a, ABC-ah pekchhuah leh tur niin Jimmy Kimmel chu host tur a ni ang. Laverne Cox, Josh Gad, leh Tatiana Maslany-te bakah Leslie Jones-te chuan Award dawngte hming puan chhuahna hi an nei dawn a ni.

Watchmen    - 26

The Marvelous Mrs. Maisel    - 20

Succession    - 18

Ozark    - 18

Schitt's Creek    - 15

The Mandalorian    - 15