Youth Empowerment Summit hmang mek

Eternity Partners leh Mizoram State Child Protection Society ṭang­kawp­ten an buat­saih, Youth Empower­ment Summit chu nimin khan Chan­mari YMA Hall-ah ṭan a ni a, vawiinah chhunzawm leh a ni ang.

He summit hi zirlaite leh ṭhalaite an career atan thil pawimawh inzirtirna leh inhrilh­hriatna hun a ni. An thiamna leh finnate hmanga zirna leh eizawnna kawnga an din chhuah theihna turin he huna tel zirlaite chu fuihna leh zirtirna pek an ni.

He hunah hian profession hrang hranga mi hlawhtling - designer te, infiammi te, entrepreneur leh kawng hrang hranga mithiam bikten zirtirna hi an pe a ni. Discussion a awm bawk a, he hunah hian zirlaite leh zirtirna petute chuan thil chi hrang hrang an sawiho a ni.

Nimin bikah khan Lalnun­kunga Sailo (Mount Carmel School Principal), Dr. Hen­ry Zodinliana Pachuau (Asst. Professor, MZU), H. Lallung­muana (PUC) Jimmy Laltlanmawia, (Managing Director, Social Justice & Development India) leh Lucy Maruati Changte (Executive Director, Gan Sabra) te chuan Skill Development chungchang an zirtir. First session-ah hian Vanneihtluanga, Lengzem editor chuan fuihna thu a sawi bawk.

Second session-ah hian BPO sector, tourism leh hos­pitality chungchang zirho a ni a, R. Lalrinchhana (Tourist Officer), Lallianmawii Fanai (Consultant), Gilbert Lalrohlua (Freelancer, Online & Digital Maketing) leh JIT Hotel Ge­neral Manager Lianmuanlal Langel-te chuan zirtirna an pe. Topic thlan chhuah hmang hian sawihona buatsaih a ni bawk.

Chawhnu lamah infiamna lama mi hlawhtling S. Mal­sawmtluanga, Vanlalmuana (Mimsa) leh H. Laldinsanga ten hun an hmang a; Lalnghinglova Hmar (Tetea), MFA Honorary Secretary chuan fuihna thu a sawi bawk.

Session hnuhnung berah hian Media-in ṭhalaite leh hnam culture a nghawng theih dan te zirho a ni bawk. He hunah hian PC Mawia (Film Pro­ducer), R. Lalmalsawma (Pho­­tographer), Raymond Colney leh Matilda LH To­chhong te chuan zirtirna an pe a ni.

Summit hi vawiin lamah chhunzawm leh a ni dawn a, thupui thlan chhuah hmangin zirtirna leh sawihona hun buatsaih leh a ni ang. He hunah hian mithiam sawm bikten zirtirna an pe leh dawn a, school leh college zirlai eng emaw zat an tel leh dawn a ni.