Billboard 200 Album Chart A ṭum thum nan Taylor Swift -i'n pakhatna a hauh leh ta

Taylor Swift album thar 'Reputation' chuan Billboard 200 Album Chart-ah pakhatna a hauh leh ta a, a zawna dinhmun sang ber a luah ṭum thumna a ni.

Reputation album hi hralh a kal char char hle a, kar liam ta chhung khan US-ah ringawt copy 147,000 hralh chhuah leh a ni. Mahse a hralhna lam hi tlangzarh a nih tirh aiin a tlahniam ve hret hret a, November thla laihawla an hralhna aṭanga a tlakhniamna chu 43% lai a ni. Album hi traditional album sale, track equivalent album (TEA) leh streaming equivalent albums (SEA) kaltlanga hralh chhuahna aṭanga chhut a ni. Kendrick Lamar, Drake leh The Weeknd te chuan chart-ah hian a zawnin pakhatna ṭum thum an lo hauh tawh bawk a, hei hi Swift hian a rawn nih rual ve leh ta chiah a ni.

Album chart-a a zawna pakhatna ṭum thum luah thei hi kuminah pali chiah an la awm a, Kendrick Lamar - DAMN, Drake - More Life leh The Weeknd - Starboy leh Taylor Swift - Reputation te hi an ni. He record an inṭawm mek hi Swift hian a khum thei angem tih chu tun kar chhunga a album an hralh chhuah dan aṭangin a hriat dawn a ni.

Tun ṭumah hian Pentatonix chuan pahnihna an rawn hauh a, an album 'A Pentatonix Christmas' tih chu copy 70,000 hralh chhuah a ni. A Pentatonix Christmas album hian chart-ah hian vawi eng emaw zat pakhatna a lo hauh tawh a, kuminah pawh hian pakhatna ni thei turin a dinhmun a ṭha hle a ni. Pentatonix hian kar hmasa khan pangana an hauh pha ṭawk a, an invawrh chak hle a ni.

Sam Smith chuan 'The Thrill of It All' hmangin pathumna a luah a, a album hi kar khat chhungin copy 62,000 zet a hralh. Garth Brooks album thar 'The Anthology: Part I' chu copy 57,000 hralh chhuah niin, chart-ah palina a ni. 'The Anthology: Part I' hi November thla khan tlangzarh a ni. Ed Sheeran pawhin 'Divide' album a hlawhtlinpui zel a, ṭum eng emaw zat pakhatna lo luah tawh Post Malone pawh a sang zingah kan hmu leh. Pink album hit 'Beautiful Trauma' pawh top 10-ah a la lang a, hralh a la kal zui zel.

Top 10-ah hian Lil Uzi Vert leh Michael Buble pawh an lang a, a hnukhartuah Fabolous leh Jadakiss te an ṭang thung a ni.