French rock star Johnny Hallyday a thi

France rock 'n' roll icon Johnny Hallyday chu Thawh­lehni khan a thi a, a thih thu hi French president office chuan a puang a ni.

Johnny Hallyday hi kumin March thla khan a chuap a cancer tih hriat chhuah a ni a, hun eng emaw chen enkawl a nih hnuah kum 74 mi niin a boral ta a ni. Hallyday hi a natna avang hian Paris-ah thla hmasa khan inenkawl tura hruai a ni a, thawk lamah harsatna nasa tak a nei bawk. A natna hian zual lam a pan zel avangin a taksain a tlin ta lo a ni.

Hallyday hi 'French Elvis' ti hiala sawi ṭhin a ni a, rock leh pop lamah sulhnu a hnutchhiah hraw hle. A lar vanglai khan tour 181 zet a nei hman a, album 18 zet tichhuakin, a hlawhtlinpui hle. Hallyday hian album hralh tam lamah record duhawm tak a hnutchhiah a, a album-te hi copy maktaduai 110 chuang zet a hralh a ni.

Actor ni bawk Johnny Hally­day hi kum 1943 khan Male­sherbes, Paris-ah a piang a, a stage name chu 'Jean-Philippe Smet' a ni teh daih. A film chan hnuhnung ber chu 'Vengeance' a ni a, kum 2009 khan tlangzarh a ni. A inlan tawhna zingah The Man on the Train (2002), Crime Spree (2003) leh The Iron Triangle (1989) te chu a lar zual an ni.

Jean-Philippe Smet hi Bul­garian-French singer Sylvie Var­tan nen an innei a, an inkawp fuh em avangin "Golden Couple" ti hiala sawi an ni. Mahse kum 1996 khan nupui dang Laeticia Hallyday a nei a, a thih ni thleng hian an inkawp a ni. French Elvis hian a nupui leh a fate pali a kalsan a ni.