Ka lemchanpui ṭhin mipa hlawh 10% bak ka chang pha ngai lo : Priyanka Chopra Jonas

Bollywood movie 60 chuang zeta lo inlan tawh, Priyanka Chopra Jonas chuan Bollywood-a film a chan chhung zawng khan lem a chanpui ṭhin mipate hlawh zat 10% ang vel bak a hlawh phak ngai loh thu sawiin, intluktlanna tak tak a awm ngai loh thu sawichhuak.

"Bollywood-ah chuan kan hlawh hi a inthlau ṭhin hle. Tun thlenga hmeichhe tam tak harsatna pawh hi a ni. Bollywood-ah pawh chang leh dawn ila, mipa te aiin ka hlawh a tlem zawk dawn a ni," tiin hlawh inthlau ṭhin chu hman aṭang tawha a vei ṭhin thu a sawi.

BBC-in '100 Women list for 2022'-a an thlan hnua a thusawiah Priyanka chuan, "Tunlaia ka hmeichhe pui leh lem ka chanpui ṭhinte hian mipa nen hlawh inang hi an ngiat ṭhin a, mahse tun thleng chuan kan la hmu thei lo a ni," tiin, "Nilenga film shoot-naah awm te kha thil pangngaiah kan nei a, ka lem chanpui ṭhin mipate erawh an duh hun hunah an rawn inlan mai ṭhin a ni," tiin Indian film industry-a kalphung nghet tak chu a tleirawl chhuah tirh khan a pawm thlap ṭhin thu leh, thil nih dan tur ve rengah a ngai ṭhin niin a sawi bawk.

Bollywood zinkawng a zawh ṭan tirhah a harsatna tawh dante sawi langin, Priyanka chuan a vun rawng vangin chhaihnawmnah a tawk ṭhin tih a sawi . "'black cat' leh 'dusky' tihten min chhaih ṭhin a, chuvang chuan ka hmelṭha tawk loah ka inngai ṭhin. Kei aia vun ngo te aiin talent nei ṭha zawk mah ila an ni aia thawh rim ka mamawh tih ka hriatchhuah phah thung a ni," tiin lemchan a luhchilh ṭan tirha a harsatna tawh dante a sawi.

Priyanka hi naupang hamṭhatna tura thawktu, UNICEF nen kum 15 an thawkdun tawh a, India ram bakah Zimbabwe, Ethiopia, Jordan leh Bangladesh-ahte rambuai vang leh khuarel chhiatna vanga harsatna tawk naupangte chu inkawmhonate a neihpui ṭhin a ni.