Mipuiten an duhzawng an thlanna People’s Choice Awards 2022 sem

Mipuiin an duhzawngte vote hmanga an thlanna, People's Choice Award chu nimin zing khan Barker Hangar, California-ah semchhuah a ni. Rimawi, television leh film lama mi hmingṭha leh, chawimawi phute chu mipuiin vote hmangin an duh ber an thlang chhuak.

Award ngaihhlut zingah, People’s Icon Award chu puanzar lawk tawh angin Ryan Reynolds hnenah hlan a ni a, People’s Champion Award chu Lizzo-i'n an dawn bakah, Shania Twain hnenah Music Icon Award hlan a ni.

Netflix series hit show, Stranger Things chuan The Show of 2022 leh The Sci-Fi/Fantasy Show of 2022 a dawng a, Kardashian chhungkua hnenah The Reality Show of 2022 hlan niin Khloe Kardashian chuan The Reality TV Star of 2022-ah an thlang.

Film lamah Marvel kutchhuak, 'Doctor Strange in the Multiverse of Madness' chu film hmuhnawm ber, The Movie of 2022-ah thlan niin, Tom Cruise channa 'Top Gun: Maverick' chuan The Action Movie of 2022 a dawng bawk a ni.

Rimawi lamah Taylor Swift, BTS, Lizzo leh Selena Gomez-te hming a langsar leh hle. Swift hian award pathum, female artist of 2022, music video of 2022 (“Anti-Hero”) leh album of 2022 (Midnights) award-te a pawm haw a ni. BTS-in award pahnih the group of 2022 leh the concert tour of 2022-an dawng. Jung Kook chuan Charlie Puth nena an thawhdunna hla, “Left and Right” hmangin collaboration song of 2022 a dawng bawk. Lizzo chuan a hla hit, “About Damn Time” hmangin song of the year a la. Gomez chuan' Only Murders in the Building' vangin comedy TV star of 2022 a dawn bakah, the social celebrity of 2022-ah thlan tel a ni.

Individual content creator zinga YouTube subscriber ngah ber Mr. Beast chu social star of 2022-ah thlan a ni bawk.