Mi lar ni chunga ṭhanlen kha hrehawm tawrhna chi khat a ni : Billie Eilish

Kum zabi 21-na a piang zinga Oscar dawng thei hmasa ber, kum 20 mi Billie Eilish chuan vantlang hriat khawpa milar ni chunga ṭhanlen kha hrehawm tawrhna chi khat a nih thu a sawi lang. Eilish hi 'Happier Than Ever' world tour chu khawmual pasarihah thla sarih chhung nei turin a inbuatsaih mek a ni.

Larna hian thil ṭha tam tak a ken tel rualin ni khat thil thua mi tichhe vek thei a ni tel. Billie Eilish hian Instagram-ah follower mtd 107 vel nei mekin, Tik Tok-ah mi mtd 60 chuangin an follow bawk. Eilish chuan mi pawi sawi zawnga post pakhat lek a siam hian mi tam tak thinurna leh huatna a chawk tho thei a, mi maktaduai chuangin an sel luai luai tawngtu nih chu thil hrehawm tak a nih thu a sawi.

Billie Eilish chuan mipui ngaihsak ni chunga a tleirawl nun hman chhoh dan te, impostor syndrome a hmachhawn dan te, a eizawnna thunun a tum dan leh hmeichhe artist ṭhahnem takin chart chung ber an luah leh festival headline-tu an ni thei chu a lawm thu a sawi lang bawk.