Aizawlah Guns N Roses hla sa thiam G2R inlan hun a thleng dawn ta

Royal Stag Aizawl Rock Fest 2017 chu zanin tlai dar 5:30 hian Bawngkawn Field-ah neih a ni dawn ta a, he hunah hian Guns N Roses hla sa ṭhin, GNR official tribute band, Guns 2 Roses te chu an perform dawn a ni.

G2R hian nimin khan MJA press club-ah Press Conference an nei a, mipui nawlpuiin an sakpui dual dual theih tur GNR hlate an sak tur thu an sawi.

G2R hi member panga niin, khawvela tribute band hlawhtling berte zinga mi an ni a, GNR keh darh lai kum 2002-a din kha a ni. Europe hmun hrang hrangah GNR hla sain tour an lo neih tawh ṭhin a, an hlawhtling thawkhat hle.

GNR original member te nen pawh tour hi an nei ho tawh a, kum 2002, 2006 leh 2012 te khan GNR hming hian tour hi an nei.

G2R hi an duai lo hle a, khawvela club hmingthang ber pawl 'The Cavern Club London'-ah a zawnin zan hnih ticket an sold out thei. He club hi The Beatles rawn lar chhuahna kha a ni a, khaw­vela zaithiam hmingthangte zaina ṭhin pakhat a ni.

Zaninah hian G2R bakah, tun hnaia Mizo zaithiam boral ta pahnih - Michael M.Sailo leh C.Sanga te hriatreng nan Scavenger project leh Tribal Power te an zai dawn bawk. Ticket hi Rs. 500/- leh Rs.1,000/- a ni a, concert-na hmunah lei theih a ni ang.

Rock fest hi nikum December 26 khan a hmun ngaiah hian neih a lo ni tawh a, India rama band ṭhate leh Mizo band ṭhenkhatte an zai a ni. Rock fest hian a tum ber chu Mizoramah music events ṭha awm se tih a ni a, ṭhalaite tan intihhlimna felfai leh changtlung tak siam sak a ni. Tun ṭumah pawh hian concert neihna tur hmun pawh uluk taka chei niin, stage pawh dangdai taka siam a ni. Stage hi interior designer Zodinliana Sailo, Zero Point Studio kut chhuak a ni.

Concert neihna hmun tur Bawngkawn Field panna kawng hi siam ṭhat a ni tawh a, a hmun thlengin metal vek a ni tawh. Kawngpui sirah hian lirthei a dah theih ang.

Ticket nei lo tan luh a remchang dawn lo a, glass bottle leh lighter ken luh phal a ni lo. Hei bakah hian video leh still camera ken luh phal a ni lo bawk a, official lo tan chuan phone hmang chauha thla lak phal a ni.