Forbes Highest-Paid Musician 2017 Diddy-a'n sum a lalut hnem ber

Forbes chuan Highest-Paid Musician 2017 list a tichhuak leh ta a, American rapper Sean John Combs chu sum lalut hnem ber a ni. Sean hi Beyoncé, Drake, The Weeknd leh Coldplay-te'n an dawt.

Sean hi rapper, singer, songwriter, actor, record producer, entrepreneur leh executive producer a ni teh duah a, stage name pawh a ngah hle. Puff Daddy, Puffy, P. Diddy leh Diddy tia sawi ṭhin a ni a, Diddy hi an hman tlanglawm ber a ni. Sean 'Diddy' Combs hi sum lakluh lamah a duai lo hle a, kum khat chhunga a sum lakluh zawng zawng hi $mtd 130 zet a ni.

Zaithiamte sum lakluh zat hi June 1, 2016 - June 1, 2017 chhunga mi a ni a, kumin kum chanve hnu lama an sum lakluh chu chhiar tel a ni lo. Diddy hian Bad Boy Family Reunion Tour aṭangin sum ṭhahnem tak a hailut a, a sumdawnna aṭanga a lakluh pawh a tam tham hle. Sum lalut tam pahnihna chu American singer Beyoncé Giselle Knowles a ni a, a sum lakluh zat hi $mtd 105 a ni. Beyonce sum lakluhna tam zawk pawh hi Formation World tour aṭangin a ni. Pathumna chu Drake a ni a, Boy Meets World tour bakah, Nike, Apple Music leh Sprite aṭanga sponsor a hmuh belhkhawm chu $mtd 94 zet a tling.

Canadian singer The Weeknd chuan $mtd 92 thawk chhuakin palina a ni. British rock band Coldplay chu pangana-ah awmin, an sum lakluh zat chu $mtd 88 a ni. Sum lalut tam zingah hian Guns N’ Roses, Justin Bieber, Bruce Springsteen, Adele leh Metallica pawh an lang a ni.

Hetih lai hian kumina sum lalut tam zualte hian nikum lam sum lalut tamte sum lakluh an phak lo hle. Nikum khan Taylor Swift chuan $mtd 170 zet a lalut a, pahnihna One Direction sum lakluh chu $mtd 110 a tling bawk. One Direction sum lakluh hi kumina sum lalut hnem ber Diddy sum lakluh zat nen a inthlau lo hle a, Taylor Swift sum lakluh phei chu a pha lo hle a ni.

Forbes Highest-Paid Musician Top 10
1. Diddy - $mtd 130
2. Beyoncé - $mtd 105
3. Drake - $mtd 94
4. The Weeknd - $mtd 92
5. Coldplay - $mtd 88
6. Guns N’ Roses - $mtd 84
7. Justin Bieber - $mtd 83.5
8. Bruce Springsteen - $mtd 75
9. Adele - $mtd 69
10. Metallica - $mtd 66.5