Time Magazine Person of the Year atan Volodymyr Zelenskyy leh "the spirit of Ukraine" thlang

Time Magazine chuan Ukraine president Volodymyr Zelenskyy leh "the spirit of Ukraine"-te chu 2022 Person of the Year atan an thlang. He chawimawina hi thla 12 liam ta chhung khawvel huapa mi huhang ngah leh mi hmingṭhate hnenah kum tin hlan ṭhin a ni. Kumina chawimawina dawng thei tura chhawpchhuah zingah Iran-a lungawi lohna lantirtu te, China hruaitu Xi Jinping leh US Supreme Court-te an ni. Magazine editor chuan Zelenskyy hnenah he chawimawina hlan chu a hriat phak china thutlukna siam awl ber tiin a sawi.

Khawvel hmun hrang hranga Ukraine mi te sawinan "spirit of Ukraine" te bakah, an ram tana theihtawp chhuahtute chu chawimawi phu ber ber an nih thu tarlangin, heng zingah Ukraine mi sang chuang hnenah a thlawna ei tur sem ṭhin, chef Ievgen Klopotenko leh Russia kutah thla thum a tan hnua chhuahzalen tak, damdawi lam thiam Yuliia Payevska-te hming chu lam hmaih thiang lo zingah an tel tih magazine's editor Edward Felsenthal chuan a sawi. Zelenskyy hian Ukraine mipui te tan theihtawp a chhuahna leh, Russia beihna huaisen taka a lo hmachhawn vangin khawvel hriat khawpin a lo lar phah a ni, a ti.

Iran hmeichhia, Blackpink leh chawimawina dang dawngtute

Iran-a hmeichhiate chu Time's 2022 Heroes of the year-ah puan an ni a, K-pop band Blackpink chu Time's Entertainer of the year-ah puan an ni bawk. American baseballer Aaron Judge chu Athlete of the Year-ah thlan a ni a, Malaysian actress Michelle Yeoh hnenah Icon of the Year hlan a ni.

Nikum lama pakhatna Elon Musk chu finalist zingah telh leh a ni. A electric car company, Tesla chu khawvela car siam chhuaktu hlu ber, most valuable carmaker-ah thlan a ni.

Time's magazine chuan kum 1927 khan hetiang ang chawimawina hi an lo sem ṭan tawh a, mahse Man of the Year tiha sem a ni thung. Ram hruaitu zingah German dictator Adolf Hitler chuan kum 1938 khan a lo dawng tawh a, kum 2007 khan Russia president Vladimir Putin chu Person of the Year atan puan a lo ni tawh bawk a ni.

Kum 10 liam taa chawimawina dawngtute:
2021 - Elon Musk (Twitter leh Tesla neitupa)
2020 - Joe Biden leh Kamala Harris (US president leh Vice President)
2019 - Greta Thunberg (Climate Activist)
2018 - "The Guardians" (journalist rual awmkhawmna)
2017 - "The silence breakers", (#MeToo hmalakna kalpuitu hmeichhe rual)
2016 - Donald Trump (US president hlui)
2015 - Angela Merkel (Germany Chancellor hlui)
2014 - "Ebola Fighters" (Africa khawmualpuia Ebola Virus dona kawnga thawktute)
2013 - Pope Francis (Catholic Church hotu)
2012 - Barack Obama (US president hlui)