Hornbill International Rock Contest 2017 pakhatna Avora Records ; The Prophets-in mimal lawmman pahnih an la

Nagaland sorkar chuan December 1-10 chhung khan Hornbill Festival a buatsaih leh a, Hornbill International Rock Contest-ah Mizo band Avora Records chu pakhatna niin, pahnihna chu Mizo band tho The Prophets an ni. Mizoram aṭanga band kalte an che ṭha a, mimal lawmman pathum an la.

Hornbill International Rock Contest 2017 hi khawvel huap a nih angin US leh Singa­pore aṭangte pawhin tel an awm a, hetiang karah hian Mizo tlangvalten hlawhtlinna an chang thei.

Pakhatna Avora Records hian Rs. 10,00,000 an dawng a, The Prophets-te'n Rs. 5,00,000 an dawng bawk. Pathumna hi Sikkim band ṭha Perfect Stick Figure Illustrations an ni a, anni hian Rs. 3,00,000/- an dawng ve bawk. Mimal lawmman pali sem chhuah a ni a, heng zinga pathum hi Mizo band-te'n an hui a ni.

Best Vocalist atan The Prophets vocalist Ronnie chu thlan a ni a, an band member tho Gordon chu Best Bassist a ni.

The Prophets hi nikum khan Hornbill Festival-ah hian an lo zu inlan tawh a, pathumna niin an vocalist Ronnie chu Best Vocalist atan hian thlan a lo ni tawh a ni. Ronnie chuan, "Hetiang dinhmun min hruai thlengtu Pathian chungah lawmthu kan sawi a, kan chhungte min thlawpna vangin kan lawm hle bawk. Kan band-in hetiang kan thleng thei hi kan lawm a, a bik takin Best Vocalist atana a zawna thlan ka nih vangin a mimal tak pawhin ka lawm hle a ni" a ti.

Avora Records guitarist Ruata Renthlei chu Best Gui­tarist atan thlan a ni a, a ni hi intihsiakna an neih chhung zawngin a che ṭha tluang hle a ni.

An band hi an combination a ṭha a, hei hi an hlawhtlinna pakhat pawh a ni. Avora Records hi kum 2016 khan a ding chauh a, mahse an sulhnu erawh a namai lo hle.

Kumina Mizoram Univer-sity-in VIBRO a buatsaihah khan Rock Contest-ah pakhatna an ni a, hei hi contest-a an tel vawi khatna a ni nghe nghe. Hemi ṭum hian Best Guitarist leh Best Vocalist an la bawk.

Hemi hnu hian Mumbai lamah an inlan zui leh a, Indian band 500 chuang telna Sennheiser Top 50 Season 3-ah pakhatna an ni leh bawk.

Season 3-ah hian East, West, South leh North India Zone te a awm a, Zone tin aṭanga band ṭha zualte chu intihsiakin, season champion an ni. Hornbill Festival-ah pawh tuma tluk rual lohin dinhmun sang ber an luah leh ta bawk.

Hornbill International Rock Contest-ah hian band 100 chuangin tel tumin demo an thehlut a, heta ṭang hian a ṭha zual 24 thlan chhuah an ni. Band ṭha thlan chhuah zingah hian USA, Singapore leh Bhutan aṭanga tel pawh an awm. December 5 aṭang khan intihsiak hi ṭan a ni a, 9 khan final neih a ni. Grand Finale-ah hian band 9 an inlan a, heta ṭang hian result hi puan a ni ta a ni.

Hornbill Festival nep loh zia kan sawi tawh a, kuminah pawh festival hi hlawhtling taka hman leh niin, hlut a hlawh hle. Festival chhimtu zingah hian India President Ram Nath Kovind pawh a tel a, ram chhung leh pawn aṭangin chhimtu an ṭhahnem hle a ni.

Rock Contest hi sum tamna ber a ni a, tel pawh a ṭhahnem hle. India rama Rock Band ṭha eng emaw zat an inlan a, khawvel ram ropui USA aṭang pawha rawn tel an awm hian a nep loh zia tichiang hle a ni. Hetiang kara kan Mizo band-te'n a ber nihna an zu hauh thei hi a lawmawm takzet a ni.

Winner - Avora Records, Aizawl (Mizoram)
Band Member - Stephen Hnamte (Vocals), Ruata Renthlei (Guitarist), Lalkhawsiama (Guitarist), Lalchhhuankima (Bassist), Lalsangzuala (Drummer)
1st Runner-Up - The Prophets, Aizawl (Mizoram)
Band Member - Ronnie (Vocals), Eric Renza (Guitarist), Gordon (Bassist), Samuel (Keyboards), Mamoia Colney (Drummer)
2nd Runner-up - Perfect Stick Figure Illustrations, Gangtok (Sikkim)
Best Vocalist - Ronnie (The Prophets, Mizoram)
Best Guitarist - Ruata Renthlei (Avora Records, Mizoram)
Best Bassist - Gordon (The Prophets, Mizoram)
Best Drummer - Maverick John (Raj Swami of Highway 69, Jharkhand)