Royal Stag Aizawl Rock Fest-ah vanduaina!

Royal Stag Aizawl Rock Fest chu December 8 zan khan Bawngkawn Filed-ah neih a ni a, khuain a zir loh bakah sound dahna lam a tluk avangin a hun hmaa tihtawp a ni.

Programme hi tlai dar 5:30 aṭanga ṭan tura tih ni mah se dar 7 velah ṭan chauh a ni. Ruah a sur avangin a entu tur mipui lam an pungkhawm chak lo a, hei vang hian a hun takah ṭan a ni lo. Ṭan hnuah pawh mipui an tam lo a, khuain a zir loh vang a ni ber ang chu. A tir lamah hian Mizo band 3 - BEE 31, Scavenger Project leh Tribal Power-te an inlan a, thawm a ṭha chho viau.

Dar 9 pelh hnuah mipui hmuh chak ber leh pun­khawm chhan ber Guns 2 Roses an rawn lang. Guns n Roses Official Tri­bute band hian boruak an rawn nei nghal hat a, entu mipui lam pawh an phur nghal hle.

Sakpui dual dual theih tur 'Knocking on Heavens Door' an rawn dinchhuahpui a, entu lam pawh an awm mai mai thei tawh lo. Mahse hetianga concert boruak a hot chhoh ṭan mek lai hian vanduaina a thleng ta hlauh mai a, sound box dahna tower chu mipui lam hawiin a tlu ta a ni. Sound tower tlu hian a bul hnaia awm mi pathum a delh a, hliam tenau an tuar.

He thil thleng vang hian Band Vocalist Gavin chuan music titawp nghalin, band member-te hian stage an chhuahsan zui nghal. Band member-te'n vanduaina thleng chu pawi an tih thu leh, thi leh hliam an awm leh awm loh finfiah turin an au chul mai a ni. Band member zingah pawi tihluat avanga mittui tla hial an awm. G2R hian vanduaina tawkte hi a hnuah an kan.

Vanduaina thlen hnu hian organiser leh sound duty lam an inrawn khawm a, programme tihtawp zui a ni.

Mipui lungawi lo, an duh ber zai la kham lote'n harsatna siam deuh mah se, buaina lian tham tak chu a chhuak zui lo.