Phone battery ṭha - Gionee M7 Power

Computer world-ah kan cheng kan ti a, mahse tunah chuan mobile world-ah kan cheng pawh ti ila kan sawi sual lutuk awm lo e. Smart phone tel lo chuan ni khat pawh kan khawsa hlei thei tawh lo a, kan chet velna leh kan hnathawhna kawng engkimah kan mamawh a ni. Mobile phone ṭha mamawhna a san mek lai hian Gionee chuan September thla khan M7 Power an tlangzarh a, Mizoram-ah pawh tun hnai khan tlangzarh a ni ve ta.

Gionee M7 Power hi a man aṭanga chhuta phone dang aia a ṭhatna chu a battery hi a ni. A battery hi 5000mAh niin, zin mi leh power supply ṭhat vak lohna hmuna chengte tan chuan hman chakawm tur tak a ni a, hna thawhna atan pawh hman tlak tur tak a ni. A screen hi 6.00-inch niin, a camera pawh a hman tlak fu a, a hnung hi 13 megapixel niin, a hma pawh 8mp lai a ni.

RAM hi 4 GB a ni a, internal storage hi 64 GB niin, memory card hi 256GB thlenga tihlen theih a ni. Gionee M7 Power-ah hian SIM pahnih a hman theih a, Accelerometer leh Ambient light sensor a awm bawk. A man hi India-ah chuan Rs.16,999/- a ni.

Gionee hi Chinese company niin, kum 2002 khan din a ni. Tunah hian India, Vietnam, Taiwan, Myanmar, Thailand leh Middle East lamahte an inzar pharh mek.