JB-a'n kang tuarte ṭanpui inpeih

Justin Bieber chuan Southern California-a ram kang nasa tak avanga harsatna tawkte chu ṭanpui a inpeih thu a sawi a, milar eng emaw zatin ṭanpuina hi pek an tum thu an sawi ve bawk.

Inrini aṭang khan California-ah hian ram a kang ṭan a, a darh zel avangin mipui an mangang tawh hle. Kangmei chhuak hian bungrua eng emaw zat a kang chhe tawh a, mi 90,000 chuangin an in leh lo an chhuahsan tawh. Mi 8,500 velin kangmei chhuak hi ṭhelh tumin an bei mek bawk.

Hetih lai hian milarte chu harsatna tawkte ṭanpui tur hian an rawn pen chhuak nghal a, Canadian singer JB-a chuan a theih anga sum leh paia ṭanpui a tum thu a puang. A ni bakah hian Miley Cyrus, Lady Gaga, Katy Perry leh midangte chuan puih an inhuam thu an sawi tawh bawk.