Benelli Keeway Mizoramah a lei theih ta

ALS Motors chuan mipuiin awlsam zawka Benelli leh Keeway lirtheite an lei theihnan dealership thar chu Chawlhmun, MZU Road Aizawlah nimin khan an hawng.

He 3S facility hi Henry Zoramthara Sailo, Dealer Principal, Benelli Keeway enkawlna hnuaiah awmin; sales, service leh parts mai bakah, genuine accessories leh merchandise-te chu mi nawlpui banphakah an chhawpchhuak thei tawh dawn a ni.

A hawnna hunah hian Benelli Keeway India managing director, Vikas Jhabakh chuan thu sawiin, India ram tuam chhuah vek an tum thu leh, an company-a lirthei leitute hnenah customer service ṭha tak pek zel an tum thu a sawi.

ALS Motors chuan lirthei ṭha leh changkang tak tak, superbike thlengin Mizoramah chah luh tumin hma lak zel an tum thu sawiin, lirthei ṭha ber mipui tan chhawpchhuah zel an tum tih Vanglaini an hrilh.