Tasmanian Tiger Kaihthawh leh tum

Kum za liam taa Aus­tralia rama hmuh tur awm ṭhin, Tasmanian Tiger an tih chu a DNA zirchian a nih hnuah siam chhuah thar leh a theih dawn nia hriat a ni a, cloning hmangin he ramsa hi kaihthawh thar leh tuma hma lak a ni.

Tasmanian Tiger tia hriat lar, Thylacine hi Aus­tralia khawmualah tunhma chuan an awm ṭhin a, Australia mainland aṭanga a mang zawh hnuah Tasmania thliarkarah hmuh tur a la awm ṭhin a, amaherawhchu mihring chetvelna avangtein an mang zel a, chhinchhiah china thi hnuhnung ber chu kum 1936-a Hobart Zoo-a thi ta kha a ni.

Hemi hnu aṭang hi chuan Thylacine-te hi hmuh tur an awm tawh ngai lo a, a mang vek tawh nia ngaih a ni. Hmun ṭhenkhatah chuan hmu anga insawi an la awm ve reng nachungin finfiahna tur a awm ngai lo. Australia sorkar chuan kum 1986 khan Thylacine-te hi khawvel ata an mang tawh niin official-in a puang.

Scientist-te chuan Mel­bourne Museum-a ethnol-ah Thylacine no taksa pêng an hmu chhuak a, kum 108 kaltaa mi kha a ni.

Hei pawh hi tum reng vanga vawn ṭhat tura ethnol-a dah ni loin, tihpalh thil thu mai a ni nghe nghe. He thil, DNA zirchianna tur hmuh­chhuah a nih avang hian scientist an lawm hle a, an hmachhawp lian ber chu Thylacine hi cloning hmanga kaihthawh leh a ni.

University of Mel­bourne-a an associate pro­fessor, Andrew Pask chuan, "Nungcha mang tawh genome kan hmuh tawh zingah chuan tuna Thylacine genome hi a kimchang ber a ni ngei ang. Thylacine-te kaihthawh lehna tura a bul ṭanna pawimawh ber a ni," a ti. Genome zirchianna hian hun a la duh rei dawn avangin a tlem berah kum 10 vel tal chu a ngaiin a ring.

Thylacine hi a lan dan maiah chuan sihal leh ching­hniate nen an inang hle a, a danglamna lian tak chu a dulah a note awmna tur, kangaroo-a pouch ang a nei a, chubakah chuan a hnung zângah sakei ṭial ang deuh hlekin a ṭial bawk. Associate Professor Task chuan a DNA an zir tawh chin aṭangin Thylacine-te hi ramsa danglam bik tak, a anpui awm zen zen lo a ni a ti.