Billboard Album 200 Chart-ah U2 an ropui ; Pakhatna hauh thei album pariat an nei ta!

Billboard Album 200 Chart-ah U2 chuan pakhatna an hauh leh ta a, chart-a dinhmun sang ber thleng thei album pariat zet an nei ta!

U2 hian December 1 khan album thar 'Songs of Experience' an tlangzarh a, hei hi album an tihchhuah 16-na a ni tawh. Heng zinga pariat hian Billboard Album Chart-ah pakhatna an hauh phak a, record ropui tak a tling. U2-in chart-a pakhatna an lo nihpui tawh album dangte chu - No Line on the Horizon, How to Dismantle an Atomic Bomb (2004), Pop (1997), Zooropa (1993), Achtung Baby (1991), the Rattle and Hum soundtrack (1988) leh The Joshua Tree (1987) te an ni. Hei bakah hian Adult Alternative Songs Chart-a pakhatna hauh thei album 13 zet an nei bawk.

U2 record hi a namai lo hle a, kum 1980 chho khan Billbord Chart-ah hian a vawi khat nan pakhatna an hauh a, 1990 chhoa an album tihchhuah chuan dinhmun sang ber a luah. Kum 2000 kan chuankai hnuah pawh an ropuina a la chuai chuang lo a, an album tihchhuah apiang chu a hit em em vek a ni. A hma amite ang thoin chart-ah pakhatna an hauh thei zel a, vawiin ni thlengin mimal leh band ṭha ber berten an la chung en a ni.

Band tam takin kum tam an daih loh laiin, kum 1976-a din Irish band-te erawhin tun thlengin album thar an tichhuak thei a ni. Album hi an tichhuak satliah a ni lo a, hralh a kal em avangin chart-ah dinhmun sang ber an luah. Songs of Experience hi kar liam ta chhung khan US-ah ringawt copy 180,000 an hralh a ni. Chart-a hun eng emaw chen pakhatna lo hauh tawh leh, tunlaia boruak nei lian tak Taylor Swift an khum ringawt pawh hi thil chhinchiah tlak tak pakhat chu a ni. Hetih rual hian Swift album 'Reputaion' hralh kal zual a reh ṭan niin a lang a, kar liam ta chhung khan copy 112,000 hralhin, pathumna a hauh pha ṭawk.

Swift-i chung chiahah hian Chris Stapleton chu awmin, a album 'Room: Volume 2' chu copy 125,000 hralh a ni. American singer hian a album hi December 1 tho khan a tlangzarh a, album chhuak thar pahnihin chart-ah dinhmun sang an luah a ni. Ed Sheeran chuan pali-na a hauh leh a, a album 'Divide' chu a la hlawhlinpui zui zel. Pentatonix pawh an hnung tawlh a, 'A Pentatonix Christmas' chu panganaah a awm a ni.

Parukna chu Demi Lovato a ni a, a album 'Tell Me You Love Me' chu copy 63,000 hralh chhuah a ni. Kar hmasaa pathumna Sam Smith chu pasarihnaah a tla thla a, pariatnaah Michael Buble a awm. Top 10-ah hian Miguel leh Garth Brooks te chu an lang bawk.