Kum li hnuah Eminem a tour leh dawn

American rapper Eminem chu hun rei tak a chawlh hnuah tour nei turin a inbuatsaih leh mek a, nakkum kum tir lam khian a chechhuak leh ṭan dawn nia tarlan a ni.

Eminem-a'n tour a neih hnuhnun ber chu 2014 daih tawh kha a ni a, a reh rei vang vang hle. Mahse tunah chuan a fan te tan thu lawmawm a awm leh ta a, December 15 hian a studio album pakuana tur 'Revival' chu a tlangzarh dawn a, hemi tihlar nan hian tour hi a nei zui dawn a ni. Tour a neih ṭan hun tur hi puan la ni lo mah se, US aṭangin bul a ṭan dawn tih a chiang tawh a, Chile, Brazil leh Argentina lam a pan zui dawn nia tarlan a ni.

Tunkar Zirtawpnia tlangzarh tur 'Revival' album hian ngaihven a hlawh hle a, Ed Sheeran leh Alicia Keys te a thawhpui tel avangin ngaihventu an tam zual a tih theih ang. Ed Sheeran hian 'River' tih hlaah a pui a, Alicia Keys pawhin 'Like Home' tih a sakpui bawk.