World Highest-Paid Actor & Actress 2017 ; Mark Wahlberg leh Emma Stone-te'n an hlawh hnem ber
Forbes chuan actor leh actress zinga a hlawh hnem zual an thlang chhuak leh ta a, mipa-ah Mark Robert Michael Wahlberg chu hlawh hnem ber niin, Emma Stone chu hmeichhe zinga hlawh hnem ber a ni thung.
American actor Michael Wahlberg hian kum khat chhungin $mtd 68 a hlawh pha a ni. Hetih lai hian hmeichhe zinga hlawh hnem ber, Emma Stone chuan $mtd 26 a hlawh a, mipa aiin hmeichhia an hlawh tlem zawk tih a chiang hle. Actor leh actress hlawh tam zinga a sang 15 chu mipa an ni a, hmeichhe zinga sum la lut hnem ber Emma Stone hi 16-naah a awm pha ṭawk a ni.
Film star zinga hlawh tam pahnihna chu 'The Rock' tia kan hriat lar Dwayne Douglas Johnson a ni a, a sum lak luh zat hi $mtd 65 a ni. WWE star hlui hian film industry a luhchilh hnuah a hlawhtling zui hle a, tunah chuan sum la lut hnem zingah a tel ta a ni. Film lar tak takah a chang nual tawh a, kumina tihchhuah Baywatch leh The Fate of the Furious-ah pawh khan a chang a ni. American actor lar Vin Diesel chu pathumna niin, film chan aṭanga a sum lak luh chu $mtd 54.5 a tling.
Pali-naah hian Adam Sandler a awm a, Jackie Chan chuan $mtd 49 hlawh chhuakin sum la lut tam pangana a ni. Tom Cruise chuan $mtd 43 la lutin pasarihna a ni a, a hnuai chiaha awm chu Bollywood super star Shah Rukh Khan a ni. Sum hlawhchhuak hnem zingah Bollywood star an lang nual a, hei hian sum che vel a tlem bik loh zia a tilang. Shah Rukh Khan hian thla 12 chungin $mtd 38 thawk chhuakin pariatna a ni a, Bollywood star dang Salman Khan ($mtd 37) leh Akshay Kumar($mtd 35.5) te chu sum lalut tam zual 10 zingah an lang bawk. Bollywood star rual hnuaiah hian Chris Hemsworth leh Tom Hanks te an awm nghe nghe.
Hmeichhe lamah chuan Jennifer Aniston leh Jennifer Lawrence ten Emma Stone hnung an zui. Aniston sum lak luh hi $mtd 25.5 niin, Lawrence sum lak luh $mtd 24 nen a inthlau lo hle.
Actor sum la lut tam zual 10 te sum thawhchhuah zat hi $mtd 488.5 zet a ni a, kum thum chhunga actress sum la lut tam zual te sum lak luh zat belhkhawm nen a inzat thuak. Actress zingah kum khat chhunga $mtd 20 la lut thei mi pathum chiah an awm a, mipa lamah chuan 10 chuang zet an awm thung. Hei hi a chhan ber nia lang chu mipaten role pawimawh an chan zel vang a ni pakhat a, film pakhat chana an hlawh hrim hrim a la inthlauh vang a ni bawk.
Forbes hian film star te hi Nielsen, ComScore, Box Office Mojo leh IMDB data aṭangin June 2016 - June 2017 inkar an sum lakluh a tehsak a, kumin kum chanve hnu lama an sum lakluh chu chhiartel a ni lo.