Celine Dion-in stiff-person syndrome a nei tih hmuchhuak

Titanic film-a hla chuai thei lo "My heart will go on" hitmaker kum 52 mi, Celine Dion chuan stiff-person syndrome a nei tih a hriatchhuah hnuah enkawlna a dawn a ngaih dawn avangin a zai lehna tur zawng zawng pawh a ṭhulh rih thu a puang.

Grammy Award vawi nga lai lo dawng tawh Celine hian, nakkuma tour a neih turte chu a taksa lamah harsatna a tawh tak avangin lungchhe tak chunga a tihtawp a ngaih thu Instagram kaltlangin a sawi. "February thla hian Europe-ah tour nei ṭan leh turin ka inpeih hman dawn lo tih hrehawm ti tak chunga ka puan a ngai a ni. Thazam lam natna vang tak stiff-person syndrome ka neih avangin enkawlna ka dawn vat a ṭul a ni," a ti. Celine hi a pasal famta Rene Angelil nena an fa pathum, kum 21 mi Rene-Charles, leh phir kum 11 mi Nelson leh Eddy-te nen an khawsa ho mek a ni.

Eng nge Stiff Person Syndrome natna?
Stiff Person Syndrome hi thazam lam natna, neurological disease vang tak a ni a, tihrawl kham leh tihrawl natna hrang hrang thlen thei tu niin, taksa chet kawngah te, khawvawt ah, rilru tawt emaw ri bengchheng bula awm vangte pawhin a thlen theih thu leh chung zinga he natnain harsatna a thlen lian ber chu nikhaw hre loa tluk a nih thu John Hopkins Medicine chuan a tarlang.

Natna vang tak Stiff Person Syndrome
He natna hi mi maktaduai khatah mi pahnih emaw pakhat vel chauhin an nei tih hmuhchhuah ni mah se, natna lan chhuah dan hran hran a la neih theih avangin hei ai hian an la tam thei bawk niin John Hopkins Medicine chuan a sawi. He syndrome hi puitling, a bikin kum 50 aṭanga kum upa lamah hmuh a ni a, mipa aiin hmeichhiaah kai hi hmuhchhuah an tam an ni.

Stiff Person Syndrome tihdamna hi a awm lo a, natna lo pian dan pawh hriat a ni lo a ni. Mithiamte chuan natna enkawlna atan hian muscle relaxer, steroids leh sedatives-te an chawh ṭhin a, physical therapy heng heat, ultrasound leh deep-tissue therapy-te ti tura rawn ṭhin an ni bawk.