Mike Shinoda album thar 'Dropped Frames Vol. 2' vawiinah

Linkin Park khaipa Mike Shinoda chuan vawiin hian a solo album thar 'Dropped Frames Vol. 2' a tlangzarh dawn a, nimin piah lamah khan a album thar tur track listing-te pawh a tichhuak tawh a ni.

Mike hian tunhnai lawk khan Forbes hnena 'Dropped Frames' album hi series thum vel a tichhuak dawn tih a lo sawi tawh a, July 10 khan 'Dropped Frames Vol. 1' chu a lo tlangzarh tawh bawk. Forbes-in an kawmnaah hian Vol.3 pawh a buaipui leh mek tawh tih a sawi bawk. Mike Shinoda hian social media lamah a lemziak a pho chhuak nasa ṭhin hle a, a album cover tur pawh hi colour loin social media-ah a pho chhuak a, a fan-te chu an duh ang anga lo colour tura tiin a nalh tih ber chu a thlang mai dawn niin a lo sawi tawh a ni.

Chester Benington thih hnuah Linkin Park hi an reh zui hle a, Shinoda erawh hi chuan nikum khan a solo album 'Post Traumatic' a tlangzarh thung a, heta hle ṭhenkhat hi chu Chester Bennington vanga a phuah/neihte a ni hlawm.

Linkin Park album hmasa ber 'Hybrid Theory' chuan kumin October hian kum 20 a tling tawh dawn a, Shinoda chuan hemi chungchang hi tunhnai lawk khan lo sawi lang tawh bawkin ABC Audio hnenah a lawmna liantham taka buatsaih a beisei tih a sawi a, LP fan-te beng a verh hle.

Chester puala concert an buatsaih hnu khan LP hi band angin an reh zui vang vang a, hmanni lawk khan an bassist Phoenix chuan thil thar eng emaw buaipui an tum tih a sawi zuai bak chu thawm an la nei leh rih lo a ni.