Khiangte Construction Ṭhazual Gospel Chart chung berah R. Lalbiaksanga "An leng dial dial"

Khiangte Construction Ṭhazual Gospel chart thar berah hranghlui zaithiam chuai thei lo leh, rimawi hmasawnna kawnga thawhhlawk R. Lalbiaksanga'n thiam taka a sak "An leng dial dial" chu pakhatnaah a rawn inhlangkai.

Rimawi lama thawhhlawk R. Lalbiaksanga
"Buaipui tham Isua", "Van khua", "Khawpuimawi" leh Pathian fakna hla lar tak tak lo phuaha lo sa ṭhintu R. Lalbiaksanga hming lam nawn a ngai tawh lo a, a zaithiam piah lamah nung taka Pathian hla sa ṭhin anihna hian mite thinlungah hna a thawk a, tuna a hla pawh hi a sa mawi lehpek hle a ni. He hla phuahtu hi YouTube Channel lar tak neitu, Lalsiamthara (Mr Wheelchair) a ni a, kum 2009 khan vanduaina tawkin chuta ṭang chuan a âwm a chin hnuai lam chu zengin, taksa thei lovin a awm ta a, bawihsawm ngaia a awm takah chuan a nu thi ta ngai em em chungin,a lunglenna aṭangin he hla "An leng dial dial" tih hi a rawn phuah chhuak ta a ni.

Pensy & Andrew leh Mahruaii an rawn lang
Zaithiam lar pahnih, Pensy B Lalthangliani leh Andrew Laltlankima thawhdunna "Krista ka nei" pawhin hma rawn sawn zelin pahnihnaah a rawn inhlangkai tawh a, Mahruaii Chhakchhuak "Zalenna dar" chu top 3-ah a rawn invawrh bawk.

Chart-a hla lang dangte
Lalrempuii Hnamte hla thar "Hmangaihna vangin" chu palinaah awmin, Rosangzuali Khiangte Krismas hla "Angelte zai ri" chu pangana a ni. Dinai C. Lalruatdiki, Sailo Lalsangzuali, R. Lalrinmawii (Arini), Teveni ft YHWH leh R. Lalbiaksanga hla vek "Riangvai lal pianni" chu chart a lang dangte an ni.