Sailova'n thawmhnaw dawr Forever 21 a hawng

Khawvel huapa hriat hlawh thawmhnaw dawr, Ramhlun South Bus Stand bula Forever 21 chu zaithiam chuai thei lo Vanlalsailova'n nimin khan a hawng.

Sailova chuan Krismas bazar hun lai a nih avangin mipui tan malsawmna a nih ngei a beisei thu a sawi. "Mizoramah khawvel huapa dawr ṭha leh changkang zawk awm tam se mipui tan awlsamna leh thil ṭha tak a ni dawn a, hei hi ṭhalaite tan phei chuan rualawhna tham a ni. Forever 21 dawr hawn a ni ve ta mai chu khawpui hmelhmang tidanglamtu tur leh hmasawnna a ni," tiin ribbon a chep chat.

1984 khan Los Angeles, California, USA-ah Forever 21 din a ni a, Aditya Birla Fashion and Retail Limited-in India-ah la lutin, sumdawnna lama an hotupa Mukesh Soni chuan an duh ang taka Mizoramah dawr an hawng thei ta chu thil lawmawm tak a ni tih a sawi a, India hmar chhaka dawr pali an hawnna a ni nghal a ni.

Dr Franklin Lalrinngheta chuan Abigail Motors hnuaiah Louis Philippe, Allen Solly leh Timothys Fashion Hub enkawl mek mah se, mipa leh hmeichhe thawmhnaw chi hrang hrang zawrhna Forever 21 an lak luh leh chhan chu a ṭhat bakah a man a tlawm a, a dintuten Pathian thu nen kalpuiin 'an shopping bag-ah bible chang Johana 3:36 a inchhu kai vek a, hei vang hian Mizote nen a inhmeh hle a ni, a ti.

Pathian hnena hlana hawn a nih hnuah anmahni dawr hmasatu mi 100 hnenah a man pangngai aia zaa sawmngaa tlawmin an pe a, card an pekten man tlawm zawkin an lei thei bawk a, intihhlimna hun an buatsaih zui nghal bawk.

Dr Marina te chhungkua hian furniture zawrhna Abigail The Home Store leh Mahindra lirthei zawrhna Mana Motors kalpui tel bawkin sumdawnna huang an zauh zel rualin Mizo ṭhalaite tana hna an siamsak ve theihnaah an ngai a, an hnuaiah hnathawk mi 250 vel an awm mek a ni.