Jin sipaia a ṭan hun a thleng ta, a lu 'buzz cut' inhmeh titu an tam

BTS member Jin chuan an ram South Korea sorkar inkaihhruaina angin sipai a zawm dawn hnai. December 4, 2022-a kum 30 pumhlum Jin hian vawiin aṭangin mandatory military service hi a zawm dawn tih report chuan a tarlang. December 11 khan Jin chuan a lu a 'buzz cut' thlalak chu social media lamah rawn pho langin internet khawvel a luah hneh nghal hle.

BTS label, BigHit Music chuan fans-te chu mahni awm hmun ṭheuh aṭanga duhsakna hlan mai tur leh, training-na hmunah va kalchilh lo turin an ngen. "Jin chuan sipaia a ṭan hun chhung chu a hmang zo vek dawn a, an lakluh ni hian eng official event mah kan huaihawt dawn lo tih min lo hriatpui turin kan ngen che u a ni. He lakluhna hun hi sipaia ṭangte leh an chhungte chauhin an hmanpui thei dawn a ni. Buaina eng emaw thleng thei lakah inveng fimkhur ula, training-na hmunah va panchilh lo turin kan ngen che u," tiin duhsakna hlan duhte chu mahni awmhmun aṭanga hlan mai turin an chah.

Jin hi vawiin aṭanga chhiar ṭanin, thla 18 chhung sipai training hi a nei dawn a ni. Kum 2010-a din, South Korean boy band Bangtan Boys member zinga upa ber Jin chuan a fan-te thlahnan tunhnai khan single thar 'The Astronaut' chu a lo tichhuak tawh bawk a ni.