HT Lalthanzami'n hla thar a tichhuak dawn

'Ka thai tluangte' tih hla mawi taka satu HT Lathanzami chuan hla thar 'Suangtuahna thamral' a tichhuak dawn.

'Suangtuahna thamral' hi Debora Lalhmangaihzuali phuah a ni a, music video chu Hebron Picture-in an buaipuisak thung. MDM library-ah karleh lamah hi chuan dah hman a tum a, Zonet lamah a music video hi kar leh chhung hi chuan thlira ngaithlak theihin a awm hman dawn a nih hmel a, YouTube lamah pawh dah chhuah thuai a tum bawk.

HT Lalthanzami hla thar hi a hla dang ang bawkin hla lungkuai tak a ni leh dawn a, hetiang lam hla hi a sak thiam zawng tak a ni bawk a, a mawi leh hle dawn ti ila kan sawisual tam awm lo e. A hla thupui ang chiah hian duhtakte bula awm chu duhthusam ni mah se suangtuahna mai a nih thu tarlanna hla lungkuai tak a ni dawn. Lalthanzami hlate hian YouTube lamah pawh thlira ngaihthlak a hlawh hle a, tuna a hla thar tur pawh hi a zai ngainatu tan chuan a nghahhlehawm hle ang.