'Joker' sequel hmasa ber tichhuak; Margot Robbie aiah Lady Gaga?

Joaquin Phoenix channa 'Joker' hlawhtling taka tihchhuah a nih hnuah, a chhunzawmna "Joker: Folie a Deux" chu production neih chhoh mek zel niin, director Todd Phillips chuan sequel atana official thlalak hmasa ber a pholang. 'Joker' thawnthu tlangpui hi thup rih la ni mah se, musical ni tura ruahman a nih thu report chuan a tarlang.

Suicide Squad (2016), Birds of Prey: And the Fantabulous Emancipation of One Harley Quinn (2020) leh The Suicide Squad (2020)-ahte hnehsawh taka Harley Quinn lema lo chang tawhtu Margot Robbie thlak turin zaithiam Lady Gaga hming lam rik mek a ni. Margot Robbie chuan "Joker 2"-ah Harley Quinn lema chang turin GaGa hi a duh thu lo tarlang tawhin, Macbeth leh Batman film-a lemchanthiam ṭha tak tak an lo inhlanchhawn tawh angin, Harley pawh hi hmeichhia lemchanthiam bikin rawn chang chhunzawm ve zel se a duh thu ,MTV-in an kawmnaah a lo sawi lang tawh a ni.

Joker 2-ah hian Zazie Beetz, Catherine Keener, Brendan Gleeson leh Jacob Lofland-te hmel kan hmu dawn. Joker fans tan erawh nghah rei a ngai deuh hret dawn a, United States bikah October 4, 2024-ah tlangzarh tura ruahman a ni.