Batman actor-te aiin a lifestyle-in ngaihven a hlawh zawk em ni?

Kum 1995-a tlangzarh Batman Forever-a Batman lema chang Val Kilmer chuan Batman film dang a  chan chhunzawm loh chhan a sawi.

The New York Times Magazine-in an kawmnaah kum 60 lai ni ve tawh Val Kilmer chuan actor-te chet ṭhat leh ṭhat loh chuan ngaihsak a hlawh tak tak lo a, chu ai chuan Batman lifestyle danglam tak chu fan-te'n an lawm zawk ṭhin tih sawiin chu chu Batman film danga a inlan loh chhan pawh niin a sawi.

"Batman lema chang tawh an tam chhan pawh hi chumi vang chu a ni," tiin Kilmer chuan a sawi.

Batman film thar tihchhuah a nih dawn apiang hian sawi hat tur hi a awm ziah a, Batman lema chang tur chungchangah pawh titi a tam ṭhin. Nakkumah Batman film thar tihchhuah leh tum a ni a, chumi avang pawh chu a ni mahna kumin chu Batman leh a chhehvelin entertainment media a luah nasa hle. 

Batman lema chang hi an tam tawh a, tunah Robert Pattinson chuan chang leh mekin mi ṭhenkhat chuan a aw an ti pawr vel tur an lo huphurh lawk hle a, ṭhenkhat erawh chuan an nghakhlel tawh thung.

Kum 1943-ah daih tawh khan Lewis Wilson chua Batsuit a lo ha tawh a, The New Adventures of Batman & Robin, 1949-a tihchhuahah khan Robert Lowery chuan a lo ha ve tawh bawk. Heng Batman-te hi a hunlai chuan lar tak a ni a, tuna kum 30 bawr vel ni tawh ho hi chuan The New Adventures of Batman & Robin series-a an theme song hi chu an la hriat ngei a rinawm.

Hun a kal deuh a, kum 1989 khan Michael Keaton chuan Batman hmaikawr a rawn vuah leh a, tlemin a hmasaa mite aiin a changkang ta deuh bawk a, a hlawhtling hle. Keaton bawk hian 1992 khan Batman Returns a chan chhunzawm leh a, hemi ṭum hian  Michelle Pfeiffer chu Catwoman lemah changin, Keaton Batman hmasa kha sum lakluh kawngah a pha lo deuh thung.

Batman Returns chhunzawmna Batman Forever chu kum 1995 khan tihchhuah leh a ni a, Keaton hi Val Kilmer chuan thlakin, a hunlaia film star ṭha ber ber an inlan. He film-ah hian  Tommy Lee Jones, Jim Carrey, Nicole Kidman leh Chris O'Donnell-te an chang a, sum pawh a hailut hnem hle a, mahse Batman (1989) sum lakluh hi a la pha chuang lo a ni.

Kum 1997-ah khan Batman & Robin tlangzarh leh niin, starring an ṭhat ang aiin Box Office-ah sum a hailut tam lo. Hetah hian George Clooney chuan Batman suit a ha ve leh thung a, Arnold Schwarzenegger, Alicia Silverstone leh Uma Thurman-te nen an chang ho a, he film hian naupang lam lawm erawh a hlawh phian.

Batman & Robin chhun­zawmna hi a tirah chuan siam tum a ni a, mahse beisei anga a hlawhtlin loh avangin Batman Unchained tia chhunzawmna siam tum chu an ṭhulh leh ta a ni.

Batman film tihchhuah a ni deuh mawlh mawlh a, Warner Bros chuan chawlh a lak det hnuah kum 2005 khan Director lar Christopher Nolan chu ruaiin, ani kaihhruaina hnuaiah Christian Bale chuan Batman suit a rawn ha leh ta a, Batman film hmasa aiin a danglam a, a 'real' bakah DC fan-te'n an beisei 'dark' Batman an hmu a; film lam review-tute'n an fak rawn nghal luai luai a; Kum 2000 chhoa film huhang ngah bera ngaih a ni hial.

Bale hian chan chhun­zawm lehin boruak nei lian tak The Dark Knight tihchhuah leh a nih phei kha chuan a sum lakluh pawh a turu hle a, a vawi khatna turin Batman film chuan $tld 1 a lalut tling ta hial. The Dark Knight hi vawiin thlenga entertainment khawvelin a theihngilh theih tawh loh tur a ni a, Batman film ṭha bera pawmtu pawh an tam hle. 

The Dark Knight chhun­zawmna The Dark Knight Rises chu kum 2012 khan tihchhuah ni lehin hei hi Batman film tihchhuah tawha sum lalut tam ber a ni bawk a, khawvela film hlawhtling ber zinga mi a ni bawk. Bale chuan a Batman thuam famkim chu dahin Batman khawvel chu a chhuahsan ve leh ta a ni.

The Dark Knight Trilogy hnu hian Batman solo movie kan la hmu leh lo a, mahse Ben Affleck chuan Batman v Superman: Dawn of Justice leh Justice League-ah Bale-a thuam dahṭhat tawh chu a rawn ha ve leh a, Batman-ah a chang dawn tih tarlan a nih khan sawiselna a nasa hle a, mahse Batman v Superman tihchhuah a nih hnuah kha chuan faktu an awm leh nual lawi si. 

Robert Pattinson chuan Batman hmaikawr rawn vuah ve lehin nakkum hian a channa 'The Batman' chu tihchhuah tum a ni a, eng tak ang ang maw?