#challengeaccepted: Women supporting Women campaign

Tunhnai ni li nga vel chhung chu instagram leh social media lamah hmeichhiate'n, milarte thlengin an thlalak rawng nei lo (black and white) an post nasa a, hei hi hmeichhe dinhmun chawisanna entirna atan an tih a ni. An thlalak post caption-ah hian #challengeaccepted tih an dah tel a, hei hi hmeichhiate an inthlawp tawnna campaign pakhat a ni.

Nimin thleng khan Instagram-ah #challenge­accepted hmang thlalak hi 53,00,000 vel zet a awm tawh a, hmeichhiate chuan an thlalak rawng nei lo an post hnuah hian midang an nominate leh zel a, hei hi nasa takin a kal kual tawh. Milarte pawhin he campaign hi an zawm nasa hle a, chung zingah chuan Model Cindy Crawford, Jennifer Garner, Eva Longoria leh Kristen Bell-te pawh an tel a, India ram milar zingah chuan Anushka Sharma leh politician Priyanka Gandhi Vadra-te pawhin an zawm ve bawk.

The New York Times report-in a tarlan dan chuan hemi challenge thlalak hmasa ber chu kar khat leh a chanve vel liam taah khan Brazilian journalist Ana Paula Padrao chuan a post a, hei hi midangin an chhunzawm ve ta zel niin an sawi.

Hetihlai hian chanchin ngaihnawm deuh dang a la awm a, chu chu Turkey lam aṭang daiha rawn irhchhuak a ni. Hmeichhe tualthih tam­na ram Turkey-ah hian hmeichhiate chuan an hmeichhiatpuite tualthi nasa lutuk an dodalna campaign niin an sawi thung. 

Turkey-ah hian nula pakhat kum 27 mi, Pinar Gutelkin chu a bialpain rapthlak takin a that a, hemi duh lohna lantirna 'challenge' hi a 'viral' ta niin an sawi ve bawk. Pinar Gutelkin thihna hian Turkey rampum a deng chhuak a, hmeichhia an rama an thih nasat zia thlenga hailan a nih tak zel hnuah 'Women’s rights activists'-te chuan kawngte zawhin an sorkar chu hmeichhe lakah tharum thawhna thleng ṭhin buaina chu chingfel turin an phut bawk. Turkey sorkar hian hmeichhiate laka tharum thawhna thleng ṭhin laka hmeichhe humhimna dan ‘Istanbul Convention’ chu sut a tum niin an sawi bawk a, hemi duh lohna hi an lantir pah bawk a ni.

Turkey-ah hian kum 2019 chhung ringawt khan hmeichhe 474 that an ni nghe nghe.Turkey-ah hian hmeichhia tualthite thlalak chu media-ah rawng nei loin an tilang ṭhin a, mitthi ruang thlalak rawng nei lo hmuh tur awm ngun lutuk bawk nen, Pinar Gutelkin thah a nih hnu hian he challenge hi a lo darh ta niin mi ṭhenkhat chuan an sawi. Hei lo pawh hi a lo chhuah chhan hi sawi dan dang a la awm mai thei a, mahse Turkey hi mi tam berin a inṭanna nia an ngaih chu a ni.