Nora Fatehi-i'n Jacqueline Fernandez lakah thubuai thehlut

Canadian lemchanthiam, Bollywood lama hming chher tak, Nora Fatehi chuan Rs vaibelchhe 200 chuang chheprelh tuma puhna thubuai nei lai, Bollywood actor vek Jacqueline Fernandez lakah defamation case a thehlut tih media report hrang hrang chuan a tarlang.

Fatehi hian Bollywood lama a lemchanpui Fernandez chu a eizawnna tihchhiatsak tumah puhin Delhi Court-ah thubuai hi a thehlut a ni.

Fatehi leh Fernandez-te hi pawisa tam tham tak chheprelhnaa bultumtu Sukesh Chandrashekhar-a thubuai kal zelah an pahnih hian thu zawhfiah tura koh an ni.

Actor pahnih inkara buaina
Fatehi sawi danin, Fernandez hian appellate tribunal hnenah ziaka thlenin, "Enforcement Directorate hian he thubuaiah hian dik lo taka min inbarluih tir laiin, Conman Sukesh Chandrashekar hnen aṭanga thilpek dawngtu celeb dang, Nora Fatehi-te chu thuhretuah an ko leh lawi si," tiin a sawi. Fatehi chuan industry pakhata eizawng an nihna leh background in ang tak aṭanga seilian an nih avangin Fernandez ṭawngkam chu inpuh hmingchhiat tumna leh, a career tihchhiatsak tumna lian takah a ngaih thu a sawi.

Fatehi hi Canadian Moroccan thlah niin, Fernandez hi Sri Lanka-a seilian a ni thung. Lemchanthiam pahnihte hi ram dang aṭanga India-a rawn pem an nih avangin Indian film industry-ah hlawhtlinna chang turin kawng thui tak an zawh a ngai a, hei vang pawh hian inhuphurh zawnga ṭawngkam neiah an inpuh a ni.

Rs vbc 200 chheprelHna thubuai chungchang
Sukesh Chandrashekar hi Fortis Healthcare promoter hlui Shivinder Singh-a nupui hnen aṭangin dan loa Rs vbc 200 laksakah puh a ni. August 17-a supplementary chargesheet-an thehluhah, Enforcement Directorate (ED) chuan Chandrashekhar hnen aṭangin Fernandez hian Rs vbc 5.71 hu thilpek a dawng a, mahse Fernandez erawhin Sukesh-a thangah a awh thu leh, thiam lohna a neih loh thu a sawi lang.

Kumin October thla vek khan, India ram a ruka chhuahsan tumah puhin Fernandez bail dilna chu ED hian lo dansak tawh a, chhuichianna neih chhung zawngin thawhpui a harsat thu leh evidence mumal tak hailan a nih hnuah chauh a inpuang tih an sawi. Hei bakah, agency chuan Fernandez hi tum reng vanga finfiahna thaichhia leh, he thubuaia midang barh luh tumah an puh.

Mahse, November thla khan Delhi Court chuan Fernandez bail dilna chu a pawmsak ta tho a. Court chuan thubuai nei lai Sukesh lakah thilpek a dawng tiha an puhna chu uluk taka ngaihtuah ṭhat a nih tur thu a sawi.

Sukesh hnen aṭanga thilpek dawngtu nia puh Fatehi chu thu zawhfiah turin vawi enge maw zah koh ni tawh mah se, inhnamhnawihna neia thubuai siamsak a ni lo thung. A statement hi prosecution complaint atan dah luh a ni thung dawn a ni.