Mariah Carey hla hit "All I Want for Christmas Is You" a rawn herchhuak

Hunpui a hnai a, Krismas hla a rawn inher chhuak leh ṭan ta. Billboard Hot 100 chart-ah kumtina kan hmuh ṭhin Mariah Carey hla hit "All I Want for Christmas Is You" chu a chung berah a rawn inhlangkai leh ta a, kar liam ta lama pakhatna Taylor Swift lead single "Anti-Hero" chu a nekchhuak.

Krismas hla chuai thei lo "All I Want for Christmas Is You" hi Carey chuan kum 1994 khan a album "Merry Christmas" aṭangin a tichhuak a, streaming service playlist hrang hrangah a invawrh chho mek a, December thla apianga Hot 100 top 10-a kan hmuh ṭhin hla tlemte zinga mi a nih bakah, Greatest of All Time Holiday 100 Songs chart chungnung ber luahtu a ni.

Top 10-ah Masi hla panga
A hunlai a ni chho bawk a, mipui thinlungin Krismas lam hla an áwn chho mek. Hot 100 top 10-ah Masi hla panga lai a rawn lang. Kum 1958-a tihchhuah, Brenda Lee “Rockin’ Around the Christmas Tree,” chu pahnihnaah awmin, famta Bobby Helms-a hla “Jingle Bell Rock,” chu pathumna a ni.

Kum 1964-a tihchhuah Burl Ives hla “A Holly Jolly Christmas,” chu palina niin, krismas hla hluite chu her lumin an awm leh mek.

Hetihlai hian Metro Boomin debut single, The Weeknd leh 21 Savage a thawhpuina hla “Creepin’ chu top 5-ah a rawn lang a, Future leh Chris Brown nena an thawhdunna “Superhero (Heroes & Villains)” chu pariatna a ni. Kar hmasa lama pakhatna "Anti Hero" chu paruknaah a tla thla thung a ni.

Artist Hot 100-a No.1 hauh rei te:
1. Mariah Carey kar 88
2. Rihanna kar 60
3. The Beatles kar 59
4. Drake kar 54
5. Boyz II Men kar 50
6. Usher kar 47
7. Beyoncé kar 43
8. Michael Jackson kar 37
9. Adele kar 34
10. Elton John/Bruno Mars kar 34