Bad Bunny-a'n rimawi chawlhsan lailawk dawn

Tunlai zaithiam huhang ngah ber pawl Bad Bunny, a hming tak Benito Antonio Martínez Ocasio chuan khawvel hmun hrang hrangah tour neia hun tam zawk a hman hnuah kum thar aṭang chuan rimawi lam chawlhsan lailawk a tum thu Billboard-in an kawmnaah a sawi.

"Kum 2023 hi ka taksa leh rilru hrisel nan, chawlh hahdamna hun atan ka hmang dawn a ni," tiin hnathawk ṭha tawkah a inngaih tawh thu a sawi.

Bad Bunny hin kumin kumtir khan hripui len hnua a tour lian tham hmasa ber, El Último Tour del Mundo chu a khuh hawng. Kum 2020-a tihchhuah, a studio album pahnihna leh pathumna YHLQMDLG leh El Último Tour Del Mundo-te chu hlawhtling takin tour a neihpui a ni.

Bunny chuan star lian tak a nih phak a rin ngai loh thu sawiin, "Kum 13 mi ka nih lai aṭangin hlate siaminm ka sa ṭhin. A ṭha ber emaw lian ber emaw leh hausa ber nih ka tum ngai lo. Rimawi ka hmangaih vanga zai ka ni a, ka suangtuahna lian ber chu inhnemhnanna tlak hmuhchhuah a ni. Tunah chuan ka ti hlawhtling thei ta," tiin a thlen chinah lungawi thlak a ti tawh hle.