Black Panther a la hrâm ring ber Kar nga chhung a záwnin pakhatna ni tawh

"Black Panther: Wakanda Forever" chuan North American box office-ah a chetṭhat a la chhunzawm zel a, US-ah na na na chuan el pha an la awm meuh lo. Marvel superhero Black Panther hian USD mtd 11.1 lakluh belh lehin, kar nga chhung a zawnin pakhatna a ni tawh a ni.

Ryan Coogler-a direct film hian US bikah USD mtd 409.8 a hailut tawh a, hripui len hnuah film aṭanga sum lakluh hi a tlahniam tih chiang takin a lang. Black Panther pawh hi kum 2022 chhunga USD mtd 400 chuang lalut thei film pathumna chauh a ni. Khawvel huapah USD mtd 358 chuang lalut tawhin, a pumpuia a lakluh belhkhawm hi USD mtd 767.8 a tling tawh a ni. Marvel film "Doctor Strange in the Multiverse of Madness" (USD mtd 411.3) a khum ngei a rinawm tak avangin kuminah North America-a film tlangzarh zingah film lalut tam pahnihna a ni phak dawn a ni.

A tlangpui thuin, kar liam ta khan box office-ah thawm nei lian an awm lo a, naktuk aṭanga theatre-a tlangzarh tur, "Avatar: The Way of Water" erawhin thawm an rawn nei lian chho viau tawh thung ang.

Theatre thawm a reh

Sawi tak angin, film thar thawm rawn nei hluai thei khawp an awm loh bakah rampuma tlangzarh thar a awm loh avangin US-a theatre-te thawm a reh hle. Kar hmasa lama top 5-te chuan an dinhmun ngai an la luah vek a ni. Comedy/Action film "Violent night" chuan USD mtd 8.7 lakluh belhin pahnihna a ni a, "Strange World" chuan USD mtd 3.6 lalut bawkin pathumna a ni.

North America Box office top 10

1. Black Panther:

Wakanda Forever - USD mtd 11.1

2. Violent Night - USD mtd 8.7

3. Strange World - USD mtd 3.6

4. The Menu - USD mtd 2.7

5. Devotion - USD mtd 1.99

6. Black Adam - USD mtd 1.34

7. The Fabelmans - USD mtd 1.2

8. I Heard the Bells - USD 7,50,713

9. Spoiler Alert - USD 7,00,407

10. Ticket to Paradise - USD 6,99,795