'Ellen DeGeneres Show' DJ hlui Stephen 'tWitch' Boss a thi

"The Ellen DeGeneres Show"-a Disc Jockey-a ṭang ṭhin, Stephen "tWitch" Boss chu kum 40 mi niin a thi. Los Angeles media report chuan mahni intihlum niin an tarlang.

TMZ sawi danin, DJ leh dancer hi Los Angeles khawpuia hotel pakhatah Thawhlehni zan khan a inkaphlum a, a taksaah hian silaia inkahna hnuhma pawh hmuh a nih thu an tarlang. Stephen-a nupui, Allison Holker chuan a pasal awm danah a ngaih a ṭhat theih loh avangin police hi a va bia a, a hnu lawkah a pasal ruang hi an chhar zui ta a ni.

"Ka pasal duhtak Stephen chuan min kalsan ta," tiin, "Stephen khan a kalna apiangah mi hlimna a thlen ṭhin. Chhungkua, ṭhiante leh khawtlang ngai pawimawh mi a ni a, hmangaihna nena hringnun hmachhawn ṭhin mi a ni. Kan chhungkaw innghahna a ni a, pasal ṭha ber leh fate tana pa ṭha ber a ni," tiin kum 34 mi, a nupui Holker chuan lungchhe takin a pasal thlahna thu a sawi.

Kum 2014-a "The Ellen DeGeneres Show" a zawm aṭangin mi hriat a hlawh chho ṭan a, nikuma he programme a tawp thlengin a inlan a ni. Dance competition show ngaihhlut tak,"So You Think You Can Dance" bakah, "Step Up" leh "Magic Mike XXL" film-ahte pawh a lo inlan tawh bawk a ni. An nupa hian "Disney's Fairy Tale Weddings" chu an host dun ṭhin. Kum 2013 khan inneiin, fa pathum an nei.

Stephen chher liantu, Ellen chuan a show-a DJ hlui thlahna thuchah sawiin, "Ka thinlung hi a keh sawm vek a ni ber. tWitch kha a bula awm a nuamin, hmangaihna ngah tak mihring a ni. Chhungkua kan ni a, ka thinlung zawng zawngin ka hmangaih a ni. Ka ngai dawn hle mai," tiin social media kaltlangin a ui thu a tarlang.