Shah Rukh Khan leh Deepika channa in sawisel a hlawh!

Shah Rukh Khan leh Deepika Padukone te film channa thar ber “Pathaan” chu an tihchhuah hma hauh aṭangin sawiselna a tawk nasa nghal hle. Bollywood tana mellung pawimawh phuntu tur tiha an lo sawi "Pathaan" hi film promotion êm pawh mumal taka kalpui a nih hma aṭangin boycott tura ngenna ṭhahnem tak a dawng nghal der tawh a ni.

"Pathaan" trailer leh hla “Besharam Rang” release a nih rualin sawisel rawn a hlawh nghal. Madhya Pradesh home minister Narottam Mishra chuan saffron rawng nena Deepika inthuamna pawnlawi tak chuan rilru bawlhhlawh tak a lantir a ni, a ti. Maharashtra BJP leader Ram Kadam chuan film siamtute chu demin, an dinna chiang taka sawi lang turin a chah a, Hindutva diriamna lam chi reng reng chu an state-ah chhuah a ni dawn lo tih a sawi lang.

He film-ah hian Hindu sakhaw vuantute huat zawng tak tarlan niin an ngai a, chu chuan Hindu-te a tilungawi lo hle. Hindu pathian leh Sanatan Dharma diriamna leh hmuhsitna lam hawi tihlan a ni tiin an sel leh luai luai a ni.

'Pathaan' hi January 25, 2023-ah tlangzarh tura ruahman a ni a, Shah Rukh Khan leh Deepika Padukone bakah John Abraham-te an inlan dawn a ni.